Álemniń 10 eliniń toǵyzqumalaqshylary Qyzylordaǵa keledi
QYZYLORDA. QazAqparat -Qyzylorda toǵyzqumalaqtan halyqaralyq týrnır ótedi, dep habarlaıdy QazAqparat tilshisi oblystyq dene shynyqtyrý jáne sport basqarmasyna silteme jasap.
Halyqaralyq jarys 2-6 naýryz aralyǵynda 15 jasqa deıingi jasóspirimder jáne odan joǵary jastaǵy eresekter arasynda ótpek.
Bıyl on birinshi márte uıymdastyrylatyn týrnır memleket jáne qoǵam qaıratkeri Nálqoja Ergeshbaevty eske alýǵa arnalyp otyr.
Týrnırge Aýǵanstan, Ázerbaıjan, Qyrǵyzstan, Qytaı, Ózbekstan, Reseı, Túrkimenstan, Túrkııa, Tájikstan jáne Qazaqstannan 200-den asa toǵyzqumalaqshylar sheberlik baıqasady. Osy jylǵy básekege Qytaı jáne Aýǵanstannyń oıynshylary tuńǵysh ret qatysatyn bolady. Jarys klassıka boıynsha 9 týrda, jas ereksheligine sáıkes 4 topta ótkiziledi.
Zııatkerlik saıysta elimizdiń qurama komanda sapynda Álem chempıondary, QR eńbek sińirgen sport sheberleri Hákimjan Eleýsinov, Ásel Dálıeva, Álem chempıondary Ǵalymjan Temirbaev, Nurbek Kabıev, Dıana Kenına, Lına Karımova óner kórsetse, Qyrǵyzstannan Azııa chempıony, Álem chempıonatynyń júldegeri Anarbek Jamakeev qatysady.
