«Álemge jol aýyldan bastalady»: Túrkistanda qyrǵyzstandyq sýretshilerdiń kórmesi ashyldy
TÚRKІSTAN. QazAqparat - Búgin Túrkistan oblystyq beıneleý óneri mýzeıinde Qyrǵyz Respýblıkasy Talas oblysy sýretshileriniń toptyq shyǵarmashylyq kórmesiniń ashylý saltanaty ótti. «Álemge jol aýyldan bastalady» atty kórmege 7 kásibı sýretshiniń 103 keskindemelik týyndysy men músini qoıyldy, dep habarlaıdy QazAqparat tilshisi.
Atalǵan is-sharaǵa qala turǵyndary men qonaqtary, zııaly qaýym ókilderi men stýdentter, mektep oqýshylary men ónerge qyzyǵýshylar, BAQ ókilderi qatysty. Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵan shara Qazaqstan men Qyrǵyzstan arasyndaǵy mádenı baılanysty nyǵaıtý maqsatynda uıymdastyryldy. Túrkistan oblysy Mádenıet jáne tilderdi damytý basqarmasy men oblystyq Sýretshiler odaǵy, oblystyq Beıneleý óneri mýzeıi uıymdastyrǵan kórmege Qyrǵyzstan Respýblıkasy Mádenıet mınıstrligi men Qyrǵyzstan Sýretshiler Odaǵy, sondaı-aq Túrkistan oblysynyń ákimdigi qoldaý bildirdi.
Kórmege Qyrǵyzstan Respýblıkasynyń sýretshileri Súıtbek Tórebekovtyń «Qyrǵyz madonnasy», «Uly dalada», «Ońtústik jaǵalaý», «Ystyq kól keshi», «Tolǵanys»(trıptıh), «Sýretshi Jaqypovtyń portreti» qoıyldy. Sonymen qatar, Qyrǵyzstan Respýblıkasynyń Halyq sýretshisi Qadirqul Orazmetovtyń «Kókshetaý-Oqjetpes», «Bishkek-Qarabalta tas joly», «Ana», «Qysqy demalys» atty týyndylary kópshilikke usynyldy. Taǵy bes sýretshiniń shyǵarmalary qoıylyp, kórermenniń ystyq yqylasyna bólendi. 
Osy kórme arqyly elimizde turatyn ulttarmen ǵana emes, basqa memlekettermen de tyǵyz baılanys ornatylǵany kórsetildi. Kórshi el sýretshileriniń ónerin baǵalaı otyryp, kórme arqyly mádenıetaralyq yntymaqtastyqtyń nyǵaıǵanyn aıqyndady. Jáne ońtústik jurtshylyǵy qyrǵyz sýretshileriniń ónerimen keńinen tanysty.
