Álemge jańa kompıýterlik vırýs qaýip tóndirýde
ASTANA. 21 qazan. QazAqparat - Symantec kompanııasynyń kompıýter qaýipsizdigi jónindegi mamandary ıran ıadrolyq baǵdarlamasynyń búlinýine qaýip tóndirgen belgili Stuxnet vırýsyna uqsas jańa vırýs tapty.
Duqu jańa vırýsy eýropalyq kompanııalar men uıymdardyń birqatar kompıýterlerinen tabyldy. Onyń maqsaty aqparat jınaýdan turady. Mamandardyń sózine qaraǵanda ol 36 kúnnen keıin ózin ózi joıatyn kórinedi, dep habarlaıdy VVS Orys qyzmeti.
«Stuxnet vırýsynan aıyrmashylyǵy Duqu basqarý júıesine kirý úshin kod suramaıdy jáne ózinen ózi kóbeımeıdi», - delingen kompanııanyń málimdemesinde.
Bylaısha aıtqanda, bul vırýs óndiristik nysandardyń kompıýterlik jelilerine shabýyldaý úshin emes, kelesi dıversııalar úshin qoldanylýy múmkin aqparattardy jınaý úshin jasalǵan.
Symantec kompanııasynyń bas tehnology Greg Deı Duqu óte kúrdeli vırýs ekenin Bı-bı-sı-ge habarlady.
«Bul jasóspirimder oılap tapqan vırýs emes, munda eń sońǵy tehnologııa qoldanylady, al bul degenińiz, ony naqty paıdalana biletin bireý jasaǵan degen sóz», - dep esepteıdi ol.
