Álemge tanymal reseılik pıanısshi D.Matsýev Astana tórinde jeke kontsertin berdi
ASTANA. Shildeniń 4-i. QazAqparat /Gúlmıra Álıakparova/ - Búgin keshqurym, elimizdiń bas qalasynda ornalasqan «Qazaqstan» Ortalyq kontsert zalynda aty álemge tanymal reseılik pıanısshi Denıs Matsýevtiń Astananyń 12 jyldyq mereıtoıyna arnaǵan jeke kontserti ótti.
D.Matsýev biregeı sáýlet dızaıny boıynsha turǵyzylǵan jańa kontsert zalynyń sahna tórinen Shýman, Chaıkovskıı, Shopen, Rahmanınov pen taǵy basqalardyń birqatar shyǵarmalaryn oryndady.
Klassıkalyq mýzykanyń sheberi D.Matsýev, bir jylda álem boıynsha 165 kontsert beredi.
Jýrnalısterge bergen suhbatynda atap kórsetkendeı, onyń tyǵyz shyǵarmashylyq ómirinde bos ýaqyty bolmaıdy. Ol kontsert barysynda demalatynyn, al bos ýaqyty shyǵyp jatsa, tennıs pen fýtbol oınap, orys monshasynan bas tartpaıtynyn aıtty.
Astanaǵa ekinshi ret at basyn tirep otyrǵan pıanısshi: «Qazaqstanda mádenı dástúrler óte mol. Astana jas bolǵanymen, barlyq salada tájirıbe jınap úlgergen. Qysqa merzim ishinde múmkin emes deńgeıge jetip, kez-kelgendi tańdandyratyn alyp shaharǵa aınaldy», - dedi.
D.Matsýev sondaı-aq jańadan boı kótergen «Qazaqstan» Ortalyq kontsert zaly men onyń akýstıkasy tamasha oılastyrylǵanyn jetkizdi. «Men ádette jańa turǵyzylǵan ǵımarattarǵa seskene qaraımyn. Astananyń Ortalyq kontsert zalynda mıkrofonsyz-aq oınaýǵa bolady. Mende aldaǵy ýaqytta orkestrmen birge gastrolge kelsem degen oı týyndady», - dep atap ótti ol.
