Álemge tanymal bloger óz qarjysyna kózi nashar kóretin 1 myń adamǵa operatsııa jasatty

ASTANA. QazAqparat – Álemge tanymal amerıkandyq YouTube blogeri MrBeast 1 myń kózi nashar kóretin zaǵıp jandardyń operatsııalaryna óz qaltasynan aqy tólegen, dep habarlaıdy QazAqparat CNN arnasyna silteme jasap.

Ótken senbi kúni jarııalanǵan sońǵy vıdeosynda MrBeast (blogerdiń esimi - Djımmı Donaldson) qandaı da bir sebeptermen kózine ota jasaı almaı júrgen kózi nashar kóretin 1 myń adamnyń operatsııa jasaýyna kómekteskenin aıtty.

Ota tek AQSh azamattaryna ǵana emes, sonymen qatar Meksıka, Brazılııa, ıAmaıka, Gondýras, Vetnam, Indonezııa jáne basqa elderdiń turǵyndaryna jasalǵan. Beınejazbada patsıentterdiń otaǵa deıingi jaǵdaıy men ota júrgizilgen soń kórý qabiletiniń jaqsarýy, olardyń emotsııalary kórsetilgen.

Bloger MrBeast tek kóz janaryn aýystyrý otalaryn tóleýmen shektelip qalmady. Ol naýqastardyń birine kolledjde oqý aqysyn tóleýge kómektesse, endi bireýine kólik te syılaǵan.

Oftalmolog jáne hırýrg Djeff Levenson MrBeast komandasyn SEE International uıymymen baılanystyrdy. Ol bloggerge búkil álem boıynsha zaǵıp naýqastardy tabýǵa jáne ota aqysyn tóleýge kómektesti. Shamamen úsh aptanyń ishinde barlyǵy 1000 operatsııa jasalǵan.

MrBeast jarııalaǵan vıdeo 44 mln-nan astam ret qaralym jınap úlgergen.

Vıdeodan alynǵan kadr/ youtube.com/user/mrbeast