Álemge tanymal Wanderlust basylymy Qazaqstandy eń tanymal týrıstik baǵyttardyń qataryna qosty
ASTANA. KAZINFORM – Bıyl bedeldi týrıstik basylymdarda Qazaqstan týraly maqalalar jıi shyǵyp jatqanyn baıqaımyz. Sheteldik týrıster men BAQ tarapynan suranystyń artýy elimizdegi týrızmniń belsendi damýymen, atap aıtqanda, bıyl kúzde elimizde ótetin Dúnıejúzilik kóshpendiler oıyndarymen baılanysty.
«Kazakh Tourism» UK» AQ baspasóz qyzmetiniń habarlaýynsha, Wanderlust álemdik basylymynyń reıtınginde Qazaqstan TOP-24 eldiń qataryna endi.
Aıta keteıik, Qazaqstan Ortalyq Azııa memleketterinen reıtıngke engen jalǵyz memleket.
«Jyldan jylǵa Qazaqstan sheteldik týrısterdiń qyzyǵýshylyǵyn arttyrýda. Sebebi, biz Wanderlust-tiń amerıkalyq jáne eýropalyq oqyrmandary úshin salystyrmaly túrde jańa baǵytpyz. Basylym tizimine ený elimizdegi týrızmdi damytý barysyndaǵy úlken jetistik desek bolady. Sheteldik týrısterdiń Dúnıejúzilik kóshpendiler oıyndary týraly bilýi de biz úshin mańyzdy. Bıyl ony Astanada ótkizemiz. Kelýshiler úshin Qazaqstandy, ásirese Astanany jańa qyrynan ashýǵa tyrysamyz», - dedi «Kazakh Tourism» basqarma tóraǵasy Qaırat Sádýaqasov.
V Dúnıejúzilik kóshpendiler oıyndaryna degen qyzyǵýshylyq Ulybrıtanııa týrısteriniń arasynda erekshe suranysqa ıe. Qazaqstan brıtandyq Wanderlust jýrnalynyń bedeldi reıtıngine engennen keıin Dúnıejúzilik kóshpendiler oıyndaryna baǵyttalǵan týrlan tez satylyp ketti.
Mysaly, Regent Holidays brıtandyq týrıstik agenttigi usynatyn týr qazirdiń ózinde «sold out» statýsynda. Wild Frontiers týrlarynyń jartysy satylyp ketken, al qalǵan jartysyndaǵy ár týrǵa tek bir ǵana bılet bar.
Suranystyń bul deńgeıi qazaqstandaǵy týrıstik ónimdi pozıtsııalaýdaǵy etnıkalyq baǵyttylyǵynyń sátti bolǵanyn dáleldeıdi. Oǵan qosa, halyqaralyq aýdıtorııa arasynda qazaqstandyq mádenı muraǵa joǵary baǵa men erekshe kóńil bólinetinin kórsetedi.
Qazaqstan Respýblıkasy osyndaı aıtýly sharanyń uıymdastyrýshysy bola otyryp, mádenı týrızm men halyqaralyq dıalog ortalyǵy retindegi ustanymyn nyǵaıtyp keledi. Bul strategııalyq kózqaras ishki jáne kirý týrızmin damytýdy yntalandyrýǵa múmkindik beredi.
«Kazakh Tourism» UK» AQ osy sharany ilgeriletýge qosqan úlesteri úshin barlyq seriktester men qatysýshylarǵa alǵysyn bildirip, halyqaralyq týrıstik qaýymdastyqty bul aıtýly is-sharaǵa belsendi qatysýǵa shaqyrady.
