Álemge tanymal anımatsııalyq fılm qazaqsha kórsetildi: Balalarǵa berer taǵylymy qandaı
ASTANA. KAZINFORM — Mamandar bul anımatsııalyq fılm qazirgi ózekti máseleni jáne onyń sheshimin kórsetetinin aıtady.
Atalǵan mýltfılmniń arnaıy kórsetiliminde halyqaralyq «Qazaq tili» qoǵamynyń prezıdenti Raýan Kenjehanuly qazaq tilindegi mazmunǵa degen suranystyń júıeli túrde artyp kele jatqanyn atap ótti.
— «Oıynshyqtar hıkaıasy 5» mýltfılminiń qazaq tilinde shyǵyp jatqany biz úshin úlken qýanysh, mereı. Bul balalardyń tilin qazaqsha shyǵarýǵa jáne ózge tilde sóıleıtin balalardy qazaq tiline qyzyqtyrýǵa kómektesedi. Búldirshinderge tartymdy, túsinikti ári tanys keıipkerlerdiń qazaqsha sóılep turýy mańyzdy. Onyń ústine, taqyryp ta qyzyq. Oıynshyqtar balalardyń nazary úshin gadjettermen kúresedi. Bárimiz úshin ózekti másele. Balalardyń qolynda qazir oıynshyqtardan bólek, gadjet te túspeıdi. Oǵan bárimiz alańdaımyz. Osy taqyrypty ashatyn taǵylymdy ári qyzyqty fılm, — dedi Raýan Kenjehanuly.
Al anımatsııalyq fılmniń qazaq tilindegi dýblıaj rejısseri Shah-Murat Ordabaev máni men mazmunyna keńirek toqtaldy.
— «Oıynshyqtar hıkaıasy» — Disney kompanııasynyń 1995 jyly alǵash shyǵarǵan týyndysy. Bıyl besinshi bólimi kórermenge jol tartyp otyr. Ár serııasy oı salady. Al osy besinshi bóliminde oıynshyqtar, ıaǵnı bas keıipkerler balany, ıakı óz qojaıynyn gadjetterdiń yqpalynan qutqarýǵa tyrysady. Óıtkeni, bul — qazir ózekti máselelerdiń biri. Balalar planshetten, telefonnan bas kótermeıdi, bir-birimen sóılespeıdi, tipti. Sonymen qatar, býllıng máselesi de qamtylǵan. Osy túıtkilderdiń sheshimi «Oıynshyqtar hıkaıasy 5»-te kóńildi, qyzyqty hıkaıa negizinde kórsetiledi. Ásirese, ata-analarǵa jaqsy keńester bar, — dedi ol.
Sonymen birge, Shah-Murat Ordabaevtyń aıtýynsha, mátindi aýdarý, bas keıipkerdi tańdaý, kastıng jasaý, fılmdi dybystaý jáne óńdeý sekildi jumystarǵa jalpy bir aıdaı ýaqyt qajet bolǵan. Al keıipkerlerdiń sózin kásibı mamandar — teatr jáne kıno ártisteri dybystaǵan.
Halyqaralyq «Qazaq tili» qoǵamynyń málimetinshe, fılmderdi túrli elderdiń aýdıtorııasyna beıimdep, jergilikti tilderge dýblıajdaý Disney kompanııasynda burynnan qalyptasqan tájirıbe. Kompanııa jyl saıyn óz fılmderiniń 40-tan astam tildegi nusqasyn ázirleıdi. Sońǵy úsh jylda Disney stýdııasy «Oıjumbaq 2», «Moana 2», «Mýfasa. Arystan patsha», «Aqshaqar», «Lılo men Stıch», «Ańdar shahary 2» jáne basqa da týyndylardy qosa alǵanda, 10-nan astam fılmdi qazaq tiline aýdaryp, dýblıaj jumysyn qarjylandyrdy.
Aıta keteıik, buǵan deıin «Ańdar shahary 2» mýltfılmi jańa rekord ornatqanyn jazǵanbyz.
