Álemge tanymal ánshi Bonnı Taıler ómirden ótti
ASTANA. KAZINFORM — «Total Eclipse of the Heart» hıt ánimen álemge tanylǵan ýelstik ánshi Bonnı Taıler 76 jasynda qaıtys boldy. Bul týraly Kazinform agenttiginiń tilshisi habarlady.
Ánshiniń ómirden ótkeni týraly onyń otbasy resmı saıtynda jarııalanǵan málimdeme arqyly habarlady.
— Bonnıdiń otbasy men shyǵarmashylyq ujymy onyń Portýgalııadaǵy aýrýhanada em alyp jatqan kezinde aýyr dertten qaıtys bolǵanyn kúızelispen habarlaıdy», — delingen málimdemede.
Bıyl mamyr aıynan beri ánshiniń densaýlyq jaǵdaıy aýyr bolǵan. Portýgalııanyń Farý qalasyndaǵy aýrýhanaǵa shuǵyl jetkizilgennen keıin oǵan ishekke operatsııa jasalyp, dárigerler ony jasandy uıqy jaǵdaıyna engizgen. Keıin Bonnı Taıler esin jıǵanymen, jansaqtaý bóliminde em qabyldaýyn jalǵastyrǵan. Densaýlyǵynyń nasharlaýyna baılanysty onyń jazǵy kontserttik týryndaǵy birqatar sharalar toqtatylyp nemese keıinge shegerilgen.
Bonnı Taıler 1951 jyly 8 maýsymda Ýelstiń Nıt qalasynda dúnıege kelgen. Álemdik tanymaldyq oǵan 1983 jyly shyqqan «Total Eclipse of the Heart» balladasy arqyly keldi. Án Ulybrıtanııa men AQSh mýzykalyq charttarynda birinshi orynǵa kóterilip, bıyl Spotify strımıng platformasynda bir mıllıard tyńdalym kórsetkishinen asty.
Ánshiniń basqa da tanymal shyǵarmalarynyń qatarynda 1976 jyly shyqqan alǵashqy úlken hıti «Lost in France» bar. 2013 jyly Bonnı Taıler Ulybrıtanııa atynan «Evrovıdenıe» halyqaralyq án baıqaýyna qatysty. Al 2023 jyly mýzyka salasynyń damýyna qosqan úlesi úshin Brıtan ımperııasy ordenimen (MBE) marapattaldy.
Eske salaıyq, buǵan deıin aty ańyzǵa aınalǵan akter Chak Norrıstiń ómirden ótkeni habarlanǵan bolatyn. Ol 86 jasynda qaıtys bolǵan edi.
