Álemge tanymal anımatsııalyq fılmniń jalǵasy qazaq tilinde kórsetiledi
ALMATY. KAZINFORM — Almatyda «Oıynshyqtar hıkaıasy 5» anımatsııalyq fılminiń jabyq kórsetilimi ótti.
Disney kompanııasynyń álemge tanymal týyndysyn endi qazaqstandyq kórermen kınoteatrlardan qazaq tilinde kóre alady. Dýblıaj rejısseri Shah-Murat Ordabaevtyń aıtýynsha, bul fılmde kópshilikke súıikti keıipkerler jańa qyrynan ashylady. Týyndynyń negizgi oıy — jahandaný men tsıfrlandyrý dáýirinde bala tárbıesiniń mańyzy.
— Besinshi bóliminiń de sáti keldi. Bul — ózi eshqashan bir taýsylmaıtyn, únemi jańa qyr taba biletin franshıza. Myna jahandaný, tsıfrlandyrý, jańa gadjetter dáýirinde onlaın ómir men áleýmettik jeliler áli sanasy bekimegen, buǵanasy qatpaǵan balalar úshin qanshalyqty keri áser týdyratyny týraly oıdy jaqsy qozǵaıdy. Osy jaǵdaımen bala emes, áke-sheshesi emes, osy oıynshyqtar kúresedi. Týyndy qazirgi zamanda óz balasyn osyndaı gadjet, sosyn tsıfrlyq býllıngten qorǵaı almaǵan ata-analarǵa bir sabaq bolady dep oılaımyn, — dedi ol.
Áıgili mýltfılmdi qazaq tilinde dybystaýǵa Zarına Kármen, Asan Májıt syndy teatr jáne kıno ártisteri atsalysqan.
Eske salaıyq, 2025 jyly Disney stýdııasy «Avatar: Ot pen kúl», «Elıo», «Lılo men Stıch» jáne «Ańdar shahary 2» fılmderin qazaq tiline dýblıajdady. Oǵan deıin álemdik kınokompanııa «Oıjumbaq 2», «Moana 2», «Mýfasa. Arystan patsha» atty týyndylaryn qazaq tiline aýdarýǵa tapsyrys berip, dýblıaj jumystaryn qarjylandyrdy.
