Álemge áıgili World Taekwondo Demo Team komandasy Astanada óner kórsetti
ASTANA.KAZINFORM – 14 tamyz kúni elordadaǵy Jaqsylyq Úshkempirov atyndaǵy Jekpe-jek saraıynda taekvondodan Kazakhstan Open 2025 halyqaralyq reıtıngtik týrnıriniń saltanatty ashylý rásimi ótti.
Ashylý rásimine Dúnıejúzilik taekvondo (WT) federatsııasynyń prezıdenti doktor Chýngvon Cho, QR Týrızm jáne sport mınıstri Erbol Myrzabosynov, Qazaqstandyq taekvondo (WT) federatsııasynyń prezıdenti Kýdrát Shamıev jáne QR Ulttyq Olımpıada komıtetiniń prezıdenti Gennadıı Golovkın qatysty.
Jarystyń ashylý saltanatynda Koreıa Respýblıkasynyń áıgili World Taekwondo Demo Team komandasy óner kórsetti. Olar ulttyq mádenıettiń elementteri men taekvondoshylardyń joǵary tehnıkalyq sheberligin úılestirgen áserli shoý usynyp, kórermenniń ystyq qoshemetine bólendi.
World Taekwondo prezıdenti doktor Chýngvon Cho quttyqtaý sózinde qazaqstandyqtardyń qonaqjaılylyǵy úshin alǵys aıtty.
— Biz Qazaqstandaǵy qonaqjaılyq pen uıymdastyrý deńgeıine shyn máninde tańǵalyp otyrmyz. Munda mádenıet pen dástúr keremet úılesken. Úlken jarystardyń Qazaqstanǵa oralǵanyna óte qýanyshtymyz. Kóp raqmet, bul naǵyz sport merekesi! , — dedi ol.
Qazaqstandyq taekvondo federatsııasynyń (WT) prezıdenti Kýdrát Shamıev qatysýshylarǵa sáttilik tiledi.
— Kazakhstan Open 2025 týrnırin qabyldaý biz úshin zor mártebe ári jaýapkershilik. Búgin bizdi tek sporttyq báseke ǵana emes, dostyq pen yntymaqtastyq rýhy da biriktirip otyr. Barsha qatysýshylarǵa sáttilik tileımin. Qazaqstanda taekvondony damytý jolyndaǵy jumysymyz alda da qarqyndy jalǵasa beretinine senemin, — dep atap ótti federatsııa basshysy.
Sonymen qatar, ashylý saltanaty barysynda Qazaqstandaǵy taekvondo qozǵalysynyń negizin qalaýshy Mustafa Óztúrik pen Qazaqstan taekvondo federatsııasynyń alǵashqy prezıdenti Bekseıit Túlkıevtiń 70 jyldyq mereıtoıyna oraı, olardyń balalary — Neslıhan Óztúrik pen Ersuńqar Túlkıevke dástúrli qazaq shapandary tartý etildi.
Bıylǵy jarysqa 22 elden 750-den astam sportshy keldi. Olardyń qatarynda Olımpıada chempıondary, álem chempıonattarynyń júldegerleri jáne álemdik reıtıng kóshbasshylary bar. Týrnır úsh kúnge sozylyp, jastar, jasóspirimder jáne eresekter arasyndaǵy básekelerdi qamtıdy.
Týrnır 16 tamyzǵa deıin jalǵasady, jalpy júlde qory 15 808 000 teńgeni quraıdy.
Osyǵan deıin eresekter arasynda Qazaqstan quramasynyń sapynan kimder el namysyn qorǵap jatqanyn jazǵan bolatynbyz.