Álemge áıgili Hı-Men keıipkerin jasaǵan Rodjer Svıt 92 jasynda kóz jumdy
ASTANA. KAZINFORM – AQSh-ta áıgili Hı-Men oıynshyq keıipkeriniń avtory Rodjer Svıt 92 jasynda ómirden ótti, dep habarlaıdy TMZ portaly.
Dızaıner uzaq ýaqyt dementsııamen kúresken. Onyń jubaıynyń aıtýynsha, Svıt óz erkimen qarttar úıine jatyp, sonda kóz jumǵan. Ómiriniń sońǵy aılarynda onyń densaýlyǵy kúrt nasharlap, em-dom men kútimge qarajat jınaý úshin qaıyrymdylyq naýqany uıymdastyrylǵan. Nátıjesinde shamamen 94 myń dollar jınalǵan.
Rodjer Svıt Mattel kompanııasynda jumys istep, «Álem ámirshileri» oıynshyqtar serııasyn jasaýǵa atsalysqan. Ol oılap tapqan Hı-Men keıipkeri keıin 1983 jyly shyqqan Hı-Men jáne Álem ámirshileri mýltserıalynyń basty qaharmanyna aınaldy.
1982 jyly jaryq kórgen Hı-Men oıynshyǵy oıynshyq ındýstrııasynda úlken ózgeris ákeldi. Buǵan deıingi keıipkerlerdiń kópshiligi (mysaly, Djedaı) qozǵalyssyz qalypta bolsa, Hı-Menniń býyndary qozǵalmaly boldy. Bıiktigi shamamen 14 sm bolatyn oıynshyqtyń eń tanymal bólshekteri – alynbaly qylysh pen balta edi, olardy osy serııadaǵy basqa keıipkerler de paıdalana alǵan.
Aıta keteıik, buǵan deıin áıgili Gollıvýd akteri Chak Norrıstiń 86 jasqa qaraǵan shaǵynda qaıtys bolǵanyn habarladyq.
