Álemge áıgili akterler Izraıl kınostýdııalarymen yntymaqtastyqtan bas tartty
ASTANA. KAZINFORM — Áıgili kıno juldyzdary men rejısserler Izraıl kınostýdııalarymen birge jumys isteýden úzildi-kesildi bas tartty, dep jazdy Anadoly.
Oskar, BAFTA, Emmı jáne Kann kınofestıvaliniń laýreattary qataryndaǵy 1300-den astam akter, rejısser jáne prodıýser palestınalyq halyqqa qarsy genotsıd pen aparteıdke qatysy bar Izraıl kınostýdııalarymen jumys isteýden bas tartatynyn málimdedi.
Manıfestke qol qoıǵandar arasynda álemge tanymal akterler Olıvııa Kolman, Mark Rýffalo, Rız Ahmed, Tılda Sýınton, Haver Bardem jáne Sıýzan Sarandon, sondaı-aq rejısserler Iorgos Lantımos, Ava Dıýverneı jáne Adam Makkeı bar.
Mátinde kınoóndiris salasyndaǵy akterler, prodıýserler men uıymdar kınonyń qoǵamdyq pikirdi qalyptastyrýdaǵy rólin túsinetini aıtylǵan.
— Gaza sektoryndaǵy jappaı qyrǵyndy kóptegen úkimetter qoldap otyrǵan osyndaı syn sátte, biz qatygez áreketterdiń ortaqtasyna aınalmaý úshin qoldan kelgenniń bárin jasaýymyz kerek, — delingen manıfest mátininde.
Avtorlar atap ótkendeı, Halyqaralyq Sot (HS) Gaza sektorynda genotsıd qaýpi «oryndy» ekenin málimdegen. Sonymen qatar, Izraıldiń palestınalyqtardy okkýpatsııalap, aparteıd saıasatyn júrgizýi halyqaralyq quqyqqa qaıshy ekenin eske salady.
— Barlyq adamdar úshin teńdik, ádildik pen bostandyqty qorǵaý — elemeýge bolmaıtyn tereń moraldyq mindet, — delingen úndeýde.
Sondaı-aq, palestınalyq kınematografısterdiń halyqaralyq kınoındýstrııaǵa únsizdikti toqtatyp, palestınalyqtarǵa qatysty adamgershilikke jatpaıtyn áreketter men násilshildikke qarsy sóz aıtýǵa shaqyrǵany aıtylǵan.
Manıfest mazmuny:
Akterler men rejısserler, montaj mamandary men kıno baǵdarlamalaýshylar qol qoıǵan málimdemede mynadaı sózder bar:
— Aparteıdke qarsy kınoqozǵalystyń» bastamasymen shabyttanyp, kezinde óz fılmderin Ońtústik Afrıkada kórsetýden bas tartqan kınematografıster sııaqty, biz de: Palestınalyq halyqqa qarsy genotsıd pen aparteıdke qatysatyn Izraıl kınouıymdarymen (festıvalder, kınoteatrlar, dıstrıbıýtorlar men prodıýserlik kompanııalar) yntymaqtastyq ornatpaýǵa, olardyń is-sharalaryna qatyspaýǵa jáne fılmderin kórsetpeýge mindettimiz.
Eske sala keteıik, buǵan deıin Izraıl Gaza sektoryndaǵy kópqabatty ǵımaratty qıratqanyn jazǵan edik.