Álemge áıgili 1 000 kitap ózbek tiline aýdarylady

Álemge belgili 1 000 kitap ózbek tiline aýdarylady. Al oqyrmandar ony mobıldi qosymsha arqyly tegin oqı alady, dep habarlaıdy Kazinform.

Ózbekstan Ádilet mınıstrliginiń málimetinshe, 28 qarashada «Jastarǵa arnalǵan 1 000 kitap» jobasyn iske asyrý sharalary týraly» prezıdent qaýlysy qabyldandy. Jobany iske asyrý Jastar isi jónindegi agenttikke júkteldi. 

Kitaptardy aýdarý jáne basyp shyǵarý eki kezeń boıynsha júzege asady. Bastapqyda saraptamalyq keńes jyl saıyn týyndylardyń aldyn ala tizimin jasaıdy. Ekinshi kezeńde ony Jastar isi jónindegi agenttiktiń aqparattyq júıelerinde jarııalaıdy. Tıisinshe ol jerden ózbekstandyqtar ózderine unaıtyn kitaptarǵa daýys beredi. Osylaısha, aýdarylatyn eńbekterdiń túpkilikti tizimi qurastyrylady. 

Joba sheńberinde jyl saıyn shyǵarylatyn kitaptardyń keminde 20 paıyzy ǵylymı-kópshilik shyǵarmalar bolady. 2023-2024 jyldary 50 kitapty aýdarý, shyǵarýǵa daıyndaý jáne basyp shyǵarý josparlanyp otyr. 

Sonymen qatar ózbek tilindegi ádebıetter jınaqtalǵan jáne tegin oqýǵa bolatyn arnaıy mobıldi qosymsha qurastyrylady.