Álemge áıgili boksshy Roı Djons Qaraǵandyǵa keledi
QARAǴANDY. QazAqparat - Qaraǵandyǵa QazKSR eńbegi sińgen jattyqtyrýshy G. Jarylǵapovty eske alýǵa arnalǵan XXHІІI halyqaralyq boks týrnırine Roı Djons keledi dep kútilýde, dep habarlaıdy «QazAqparat» HAA tilshisi oblystyq dene shynyqtyrý jáne sport basqarmasynyń baspasóz qyzmetine silteme jasap.
«19-24 jeltoqsan aralyǵynda Qaraǵandyda QazKSR eńbegi sińgen jattyqtyrýshy G. Jarylǵapovty eske alýǵa arnalǵan dástúrli XXHІІI halyqaralyq boks týrnıri ótedi. 20 jeltoqsan saǵat 18.00-de S.Sápıev atyndaǵy boks ortalyǵynda saltanatty ashylýy bolady. Ashylý saltanatyna olımpıada chempıondary Ermahan Ybraıymov, Serik Sápıev, 1980 jyly Máskeý olımpıdasynyń jáne 1988 jyly Seýlde ótken Olımpıadanyń qola júldegeri, vaterpolshy Sergeı Kotenko, Afınydaǵy olımpıada júldegeri, onsaıysshy Dmıtrıı Karpov, boksshy Serik Eleýov qatysady. Týrnırge álemge áıgili boksshy Roı Djons keledi dep kútilýde», - dep aıtylady habarlamada.
Uıymdastyrýshylardyń málimetine súıensek, týrnırge Qazaqstan, Qytaı, Tájikstan, Ózbekstan, Reseı men Qyrǵyzstan elderinen 100-den astam boksshy qatysady. Bes kún boıy 10 salmaq dárejesindegi jekpe-jekter ótedi. Týrnırdi «Kazsport» arnasy tikeleı kórsetilim júrgizedi.
Eske ala keteıik, jattyqtyrýshynyń uly, týrnırdiń uıymdastyrýshysy Nurǵazy Jarylǵapovtyń shaqyrtýymen eki jyl buryn Roı Djons Qaraǵandyǵa kelgen bolatyn. Amerıkalyq boksshy qazaqstandyqtardyń qonaqjaılylyǵyna tánti bolǵan. «Meni qalaı kútip alǵandary, barlyǵyn tanystyryp, kórsetkenderi júregimde máńgilik saqtalady. Men úshin qonaqjaılylyq, ózińdi sol otbasynyń bir múshesi retinde sezine alý mańyzdy dep esepteımin. Qazaqstandyqtar barlyǵyna jarqyn júzben qarap, árdaıym keń peıilmen qarsy alady», - dep atap ótti tanymal boksshy.
QazKSR eńbegi sińgen jattyqtyrýshy G. Jarylǵapovty eske alýǵa arnalǵan XXHІ halyqaralyq boks týrnırinde Roı Djons rep-oryndaýshy retinde qatysqan. Ol jandy daýysta úsh ánin oryndady. Shoý-baǵdarlama barysynda Roı Djons jas qazaqstandyq boksshy Ablaı Júsipovke qoltańbasy qoıylǵan boks qolǵabyn syıǵa tartqan. Tanymal boksshy sol mezgilde Qazaqstanǵa áli talaı keletinin aıtqan bolatyn.
