Álemge áıgili «Bıg-Ben» munarasy jańǵyrtylyp jatyr
ASTANA. QazAqparat - Londonda álemge áıgili «Bıg-Ben» munarasy jańǵyrtylyp jatyr. Jóndeý jumystary 3 jylǵa sozylýy tıis, dep jazady «Habar 24».
Joba quny 29 mln sterlıng fýntty quraıdy. Bul shamamen 42 mln AQSh dollaryna teń.
Aıta ketken jón, «Bıg-Ben» Londonnyń mańdaıǵa tutyp, maqtanysh eter erekshe oryndarynyń biri sanalady. Tarıhı nysan talaıdan beri jóndeý kórmegen eken. Sonyń kesirinen, 2015 jyldan beri munara saǵaty qalyp kete beredi eken. Sol sebepti ýaqyt belgisiniń tetigin jóndep, munaranyń ózin qalpyna keltirý jóninde sheshim qabyldanǵan.
«Jóndeý jumystaryn úsh kezeńge bóldik. Aldymen saǵattyń ózin qalpyna keltirýmen aınalysamyz. Odan keıin munarany jóndeý sharalaryn qolǵa almaqpyz. Sonymen qosa, «Bıg-Ben» munarasyn kórkeıtý jumystaryna da erekshe mán berilgen. Máselen jańa lıft ornatyp, qýat kózin únemdeý úshin jaryqtandyrý júıesin almastyrý josparda bar», - deıdi sáýletshi Adam Vatrobskıı.
