Álemge áıgili 12 fýtbolshynyń qazaqstandyq jetkinshekterdi qalaı úıretetini belgili boldy
ASTANA. QazAqparat - 6 tamyz kúni «EXPO 2017 Football Cup» saıysy aıasynda Elordadaǵy «Astana Arena» stadıonynda álemniń úzdik fýtbolshylary sheberlik synyptaryn ótkizedi, dep habarlaıdy «QazAqparat» HAA tilshisi.
Uıymdastyrýshylardyń biri Álııa Adambaevanyń aıtýynsha, sheberlik sabaǵyna Qazaqstannyń túkpir-túkpirinen fýtbolmen aınalysatyn 300-ge jýyq bala qatysady. Qatysýshylardyń arasynda balalar úıinen de keletinder bar.
«Balalardy «EXPO 2017 Football Cup» saıysyna qatysatyn ár komandanyń eki oıynshysy jattyqtyrady. Nátıjesinde, jeltoqsanda, ıaǵnı 6 tamyz kúni álemge tanylǵan 12 fýtbolshy balalardy daıarlaıdy. Ár úıretýshiniń óziniń mindeti bar: máselen, olardyń biri dopty qalaı berý kerektigin úıretse, ekinshisi soqqy jasaý, taǵy sol sekildi ádisterdi úıretedi», - deıdi ol.
Uıymdastyrýshynyń sózine súıensek, balalar bir jattyqtyrýshydan ekinshisine aýysyp turatyn bolady. Sheberlik synyptarynda jattyqtyratyn fýtbolshylardyń tizimi dúısenbi kúni belgili bolmaq.
Eske sala ketsek, EKSPO-2017 kórmesi aıasynda 5 tamyz kúni elordanyń «Astana Arena» stadıonynda «EXPO 2017 Football Cup» halyqaralyq fýtbol týrnıri bastalady. Elordalyq stadıonda Qazaqstan, Reseı, Italııa, Germanııa, Portýgalııa qurama komandalary men álem quramasy oınaıdy. Týrnırde Dıno Badjo, Marko Delvekkıo, Nýný Manıshe, Jan-Per Papen, Roman Shırokov, Valerıı Karpın, Aleksandr Fılımonov syndy álemdik fýtboldyń ardager juldyzdary óner kórsetedi.
