Álemdik juldyzdardyń kontserti qazynaǵa 1 mlrd teńgeden astam qarjy ákelýi múmkin

ASTANA. KAZINFORM — Bıyl elimizde álemge tanymal birneshe ártis kontsert beredi. «A» sanatyndaǵy álemdik kontsertterden el qazynasyna 1 mlrd teńgeden astam qarjy túsedi degen boljam bar. Tolyǵyraq «Astana Kontsert» kompanııasynyń prodıýseri Málik Hasenov aıtyp berdi.

— Aldaǵy 3 jyl ishinde «A» sanatyndaǵy 10-nan astam kontsert ótkizemiz, bul úderis qazirdiń ózinde bastalyp ketti. Bıyldy qorytyndylaı kele kontsertterdi uıymdastyrýmen aınalysatyn kompanııalar toby 1 mıllıard teńgeden astam salyq tóleıdi dep aıtýǵa bolady. Biz áli kontserttiń ekonomıkalyq jalpy áseri týraly aıtqan joqpyz. Sebebi biz Djeı Lonyń Astana men Almatydaǵy kontsertine keletin týrıster sany 18 myń adamǵa jýyqtaıdy dep otyrmyz. Al Backstreet Boys toby kontsertinen odan da joǵary kórsetkish kútip otyrmyz, — dedi Málik Hasenov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qazir «Astana kontsert» komandasy jańa jobalar boıynsha kelissóz júrgizip jatyr.

— 10-nan astam juldyzben kelissóz júrgizip jatyrmyz. Juldyzdardyń týr kestesin bilip, sonyń arasyna Astanany kiristirý kerek. Týr aıasynda bılet baǵasy ár kezde ártúrli bolady, onyń ústine logıstıka men kontserttik baǵdarlamaǵa da baılanysty, — deıdi ol.

Degenmen álemdik deńgeıdegi kontsert uıymdastyrýshylar aldaǵy ýaqytta elimizge keletin juldyzdardyń esimin ázirge jarııalamaı otyr.

— Qazir biz naqty esimderdi jáne kimnen aldyn ala kelisim alǵanymyzdy aıta almaımyz. Kelesi jylǵa úsh rastalǵan kelisim bar. Jobalardyń ázirlik deńgeıi — 70%. Álemdik deńgeıdegi oryndaýshylardyń Qazaqstanda óner kórsetýin uıymdastyrý baǵytynda jumys istep jatyrmyz, — deıdi Málik Hasenov.

Buǵan deıin habarlaǵanymyzdaı Backstreet Boys tobynyń kontsertine bılet 14 shildede satylymǵa shyǵady. Kontsert Almaty jáne Astana qalasynda ótedi. 

Eske salaıyq, bıyl 1 tamyzda álemge tanymal pop-juldyz Djennıfer Lopes Astanada kontsert beredi.