Álemdik jetekshi ıslam banki Qazaqstandaǵy ınvestıtsııalyq jobalardy zertteýge qyzyǵýshylyq tanytty
ASTANA. KAZINFORM — Qazaqstan Respýblıkasynyń Kýveıt Memleketindegi Elshisi Erjan Elekeev Kuwait Finance House (KFH) Dırektorlar keńesiniń tóraǵasy Hamad Ál-Marzýkpen kezdesý ótkizdi. Bul týraly SІM-niń baspasóz qyzmeti málim etti.
Kezdesý barysynda taraptar ınvestıtsııalyq, bank jáne saýda-ekonomıkalyq salalardaǵy qazaqstandyq-kýveıttik yntymaqtastyqty damytý perspektıvalaryn talqylady.
— Azyq-túlik qaýipsizdigi máselelerine erekshe nazar aýdaryldy. Qazaq Elshisi Qazaqstan Respýblıkasynyń agroónerkásip salasyndaǵy, onyń ishinde et ónimderin óndirýdegi zor áleýetin atap ótip, elimizdiń Kýveıt Memleketi men búkil óńirdiń azyq-túlik qaýipsizdigin nyǵaıtýǵa úles qosýǵa daıyn ekenin jetkizdi. Osy turǵyda qazaqstandyq aýyl sharýashylyǵy ónimderin Kýveıt naryǵyna jetkizý múmkindikteri, sondaı-aq Qazaqstan aýmaǵynda agroónerkásiptik jáne mal sharýashylyǵy kásiporyndaryn qurý boıynsha birlesken ınvestıtsııalyq jobalardy iske asyrý máseleleri qarastyryldy, — delingen vedomstvonyń habarlamasynda.
Qazaqstan Elshisi suhbattasýshyny Qazaqstanda júzege asyrylyp jatqan «Alatau City» jobasy týraly habardar etti. Bul joba — ınnovatsııalyq jáne ınvestıtsııalyq ınfraqurylymy damyǵan, jedel damý qaǵıdattaryna negizdelgen zamanaýı tsıfrlyq qala retinde qalyptasyp jatqan elimizdegi eń iri ýrbanıstıkalyq jobalardyń biri.
Kýveıt tarapy azyq-túlik qaýipsizdigi salasyndaǵy yntymaqtastyqty damytýǵa erekshe qyzyǵýshylyq bildirip, qazaqstandyq kompanııalarmen ózara is-qımyl múmkindikterin qarastyrý nıetin jetkizdi. Sonymen qatar, Kuwait Finance House ókilderi bank sektoryndaǵy yntymaqtastyqty damytýǵa, atap aıtqanda Qazaqstanda banktik qyzmetti júzege asyrýǵa lıtsenzııa alý rásimderi men talaptaryn zerdeleýge qyzyǵýshylyq tanytty.
1977 jyly qurylǵan Kuwait Finance House (KFH) — Kýveıt Memleketindegi alǵashqy ıslam banki jáne álemdegi jetekshi ıslamdyq qarjy ınstıtýttarynyń biri. Quny shamamen 11,6 mlrd AQSh dollaryn quraǵan Ahli United Bank Group bankin satyp alǵannan keıin KFH aktıvteri 140 mlrd AQSh dollarynan asatyn Kýveıttegi eń iri bankke aınaldy, al naryqtyq kapıtalızatsııasy shamamen 47 mlrd AQSh dollaryn quraıdy.
Top 12-den astam elde, sonyń ishinde Túrkııada qyzmet júrgizedi. Túrkııadaǵy negizgi aktıvteriniń biri — eldegi eń iri ıslam bankteriniń biri bolyp tabylatyn Kuveyt Türk Participation Bank. KFH ıslamdyq oblıgatsııalar (sýkýk) naryǵyndaǵy jetekshi oıynshylardyń biri bolyp tabylady jáne Taıaý Shyǵys, Eýropa men Azııa elderindegi ınfraqurylym, energetıka, jyljymaıtyn múlik jáne ıslamdyq ınvestıtsııalyq bankıng salalaryndaǵy iri jobalardy qarjylandyrýǵa belsendi qatysady. 2026 jyly KFH London qor bırjasynda 1 mlrd AQSh dollary kóleminde sýkýk ornalastyrdy.
Eske sala keteıik, 2025 jylǵy 25 qarashada Qazaqstan Respýblıkasynyń Elshisi Erjan Elekeev Qazaqstannyń Kýveıttegi elshisi qyzmetine kirisken bolatyn.
