Álemdik ıadrolyq ındýstrııa ókilderi Qazaqstanmen tájirıbesin bólispek

ASTANA. KAZINFORM - Qazaqstanda atom elektr stantsııalary salynǵan jaǵdaıda álemdik ıadrolyq ındýstrııa ókilderi jan-jaqty qoldaýǵa ázir. Bul týraly Dúnıejúzilik ıadrolyq qaýymdastyqtyń bas dırektory málimdedi, dep habarlaıdy Kazinform tilshisi.

Sama Bılbao-I-Leonnyń pikirinshe, bul salada ábden ysylǵan memlekettermen áriptestik ornatý óte mańyzdy. Ol elder ınfraqurylymdy josparlaý, normatıvti-quqyqtyq baza qurý jáne qarjylandyrý sııaqty máseleler boıynsha baı tájirıbelerimen bólisýge ázir.

Halyqaralyq sarapshy Qazaqstanmen qatar Ózbekstan, Qyrǵyzstan sııaqty Ortalyq Azııa memleketteriniń taza energııa óndirisine erekshe qyzyǵýshylyq tanytyp otyrǵanyn aıtady.

“Osy jyly biz Qazaqstanda bolyp, Dúnıejúzilik ıadrolyq forým ótkizdik. Álemniń túkpir-túkpirinen sarapshylardy shaqyryp, salanyń qaı baǵytta damyp jatqany jaıly aqparat berdik. Qazaqstan taza energııany AES arqyly tabýǵa nıettengen jaǵdaıda biz ozyq tájirıbelerimizben bólisýge árdaıym ázirmiz”, - dedi Dúnıejúzilik ıadrolyq qaýymdastyqtyń bas dırektory Sama Bılbao-I-Leon.