Álemdik top-10-nan túsken emespiz: halyqaralyq olımpıada júldegerleri jeńis syrymen bólisti
ASTANA. KAZINFORM – Halyqaralyq hımııa olımpıadasynda kúmis medal ıelengen qazaqstandyq oqýshylar jarys aldyndaǵy daıyndyqtyń birneshe kezeńnen turǵanyn aıtady. Olardyń sózinshe, ulttyq qurama teorııalyq bilimmen qatar, zerthanalyq tájirıbelerge de erekshe kóńil bólgen.
Bul týraly olımpıada júldegerleri Ańsar Jaqsylyqov pen Ábilmansur Qalı Jibek Joly telearnasynyń «Búgin LIVE» baǵdarlamasynda aıtty.
– Olımpıadadan keıin ózimizdi bir jeńil sezinip otyrmyz. Osy jarysqa daıyndyq ótken aıdyń ortasynda bastaldy. Bizdi QazUÝ-da jınap, professorlarmen teorııalyq ári praktıkalyq daıyndyqtan ótkizdi. Qazaqstan quramasy tórt oqýshydan quralǵan. Olımpıada aldyndaǵy oqý-jattyǵý jıyny eki aptaǵa sozyldy, – dedi halyqaralyq olımpıadanyń kúmis júldegeri Ańsar Jaqsylyqov.
Ol hımııalyq olımpıadalarǵa daıyndyqtyń kádimgi mektep baǵdarlamasynan ózgeshe ekenin atap ótti.
– Hımııalyq olımpıadaǵa arnaıy taktıkamen daıyndalasyń. Teorııalyq tapsyrmalar oryndap qana qoımaı, zerthanada tájirıbeler jasap, praktıkalyq daǵdylardy jetildiremiz, – dedi júldeger.
Ańsar Jaqsylyqovtyń aıtýynsha, hımııaǵa degen qyzyǵýshylyǵy 7-8 synypta paıda bolǵan. Sondaı-aq ol qazirgi tańda Qazaqstan quramasy halyqaralyq olımpıadalarda turaqty túrde álemniń úzdik komandalarynyń qatarynda ekenin aıtty.
– Qazaqstannyń ózi de myqty quramalardyń qatarynda. Jyl saıyn álemdik top-10, tipti top-7 komandanyń ishinde turaqty oryn alyp keledi. Bıyl da qarsylastarǵa des bergen joqpyz, – dedi ol.
Qazir eki oqýshy da 11-synypty támamdap jatyr. Ańsar Jaqsylyqov Spectrum International School mektebinde, al Ábilmansur Qalı Astana qalasyndaǵy NIS Nura fılıalynda bilim alady.
Olardyń aıtýynsha, olımpıadadaǵy jetistik aldaǵy akademııalyq jolyna da úlken múmkindik beredi.
– Mundaı halyqaralyq olımpıadalar álemniń jetekshi ýnıversıtetterine túsýge kómektesedi. Óıtkeni bul jetistik halyqaralyq ǵylymı olımpıada retinde joǵary baǵalanady, – dedi Ábilmansur Qalı.
Sonymen qatar elordalyq oqýshylar bolashaqta materıaltaný jáne fızıkalyq hımııa baǵytynda bilimin jalǵastyrýdy josparlap otyrǵanyn jetkizdi.
Eske salaıyq, buǵan deıin, Qazaqstan quramasy Birikken Arab Ámirlikterinde ótken Halyqaralyq hımııa olımpıadasynda (IChO) tórt medal jeńip alǵanyn habarlaǵan edik. El namysyn qorǵaǵan tórt oqýshynyń barlyǵy kúmis júldege ıe bolyp, Qazaqstan quramasy álemdegi úzdik nátıjelerdiń birin kórsetti.
