Álemdik saıasatta yqpaly zor memleketter bizdiń pikirimizge qulaq asady – Prezıdent
ASTANA. KAZINFORM – Birinshi shaqyrylymdaǵy Quryltaıdyń birinshi sessııasyn ashqan Qasym-Jomart Toqaev elimiz beıbitshilik, ózara dostyq pen tıimdi seriktestik qundylyqtaryn kúlli álemge tabandy túrde dáripteı beretinin málimdedi.
– Barshańyz álemdegi ahýaldyń asa kúrdeli ekenin, boljaýǵa kelmeıtinin kórip-bilip otyrsyzdar. Ózara senim joǵalǵan, turaqsyzdyq beleń alǵan mundaı almaǵaıyp kezde Qazaqstannyń halyqaralyq bedeli bıik turǵanyn aıryqsha atap ótken jón. Jahan elderi, sonyń ishinde álemdik saıasatta yqpaly zor memleketterdiń ózi bizdiń pikirimizge qulaq asady. Bul – óte mańyzdy, – dedi ol.
Sonymen qatar Prezıdenttiń sózinshe, ulttyq múddemizdi bárinen bıik qoıa otyryp, elimizge tán beıbitshilik, ózara dostyq pen tıimdi seriktestik qundylyqtaryn kúlli álemge tabandy túrde dáripteı beremiz.
– Túptep kelgende, ult bolyp uıysa almasaq, azamattarymyz ortaq iske jumylmasa, osy jetistikterdiń eshqaısysy da bolmas edi. Elimizdiń basty qýaty, ıaǵnı, strategııalyq basymdyǵy – halyqtyń myzǵymas birliginde jáne jasampaz rýhynda. Biz ozyq el retinde bıik maqsattarǵa umtylýymyz kerek. Usaq-túıek, kertartpa áńgimelerge, áleýmettik enjarlyqqa urynbaı, árqashan alǵa úmitpen, senimmen qaraýymyz qajet. Bizdiń naqty josparymyz bar, baǵdarymyz da – aıqyn. Tek ózimizge senip, tabandy jumys isteýimiz kerek, – dedi Memleket basshysy.
Aıta keteıik, buǵan deıin Quryltaıdyń arqasynda saıası dástúr zamanaýı basqarý júıesimen ushtasatyny jónindegi Prezıdent málimdemesin jarııalaǵanbyz.
