Álemdik sáýlet alyptary Alataý qalasynyń tujyrymdamasyn tanystyrdy

ASTANA. KAZINFORM — Qanat Bozymbaev álemniń jetekshi sáýlet bıýrolarynyń ókilderimen kezdesti. Bul týraly Úkimettiń baspasóz qyzmeti habarlady. 

Premer-mınıstrdiń orynbasary Qanat Bozymbaev Alataý qalasynyń sáýlettik damý tujyrymdamasynyń tanystyrylymyna qatysty. Álemge tanymal eki kompanııa – Zaha Hadid Architects jáne Skidmore, Owings & Merrill LLP (SOM) ózderiniń avtorlyq ıdeıalaryn usyndy. Bul kompanııalar portfolıosynda Dýbaıdaǵy Burj Khalifa, Nıý-Iorktegi One World Trade Center, Beıjińdegi Leeza SOHO syndy áıgili bıik ǵımarattar bar.

Kórsetilgen jobalarda Alatau City qalasynyń dızaın-kody men qalanyń tanymal belgisine aınalatyn Iconic building jobasynyń nobaıy tanystyryldy. Usynylǵan sheshimder zamanaýı halyqaralyq sapa standarttaryn eskere otyryp, tik baǵyttaǵy qurylysty jáne asa bıik ǵımarattar salý isin damytýǵa baǵdarlanǵan.

Sondaı-aq qalalyq ortany keshendi túrde damytýǵa erekshe nazar aýdaryldy. Bul rette kólik ınfraqurylymy, kireberis magıstraldar, tabıǵı landshafttar men aımaqtyń klımattyq erekshelikteri eskerildi. Qoǵamdyq keńistikterdi basym baǵyt retinde damytý da mańyzdy bólik retinde qarastyryldy.

Kezdesý sońynda Qanat Bozymbaev sáýlet bıýrolarynyń ókilderine usynǵan ıdeıalary úshin alǵys bildirip, taraptar ózara tıimdi yntymaqtastyqty jalǵastyrýǵa daıyn ekenderin bildirdi. 

Aıta ketelik Úkimet «Іsker aımaq» biryńǵaı baǵdarlamasyn bekitken edi.