Álemdik saýda flotynyń besten biri grekterge tıesili

ASTANA. KAZINFORM — Grekııanyń saýda floty álemdegi eń irilerdiń biri sanalady — ol 5 700 kemeden turady jáne álemdik saýda flotynyń 20%-yn quraıdy, dep habarlaıdy Shipping Herald.

Grek saýda floty álemdik flottyń 20%-yn jáne Eýropalyq odaq flotynyń 61%-yn quraıdy. Bul kórsetkishter Grek keme ıeleriniń odaǵynyń esebinde keltirilgen.

Sonymen qatar jarııalaǵan jyl saıynǵy esepte atap ótilgendeı, Grekııa jahandyq jáne eýropalyq energetıkalyq, azyq-túlik qaýipsizdigin qamtamasyz etýge, sondaı-aq jetkizý tizbeginiń turaqtylyǵyna eleýli úles qosyp otyr.

Budan bólek esepte grek keme ıeleriniń teńiz salasyndaǵy «jasyl aýysymda» kósh bastap turǵany aıtyldy. Olar qorshaǵan ortaǵa zııany az, energııany tıimdi paıdalanatyn tehnologııalarmen jabdyqtalǵan jańa kemelerge turaqty túrde iri ınvestıtsııalar salyp keledi.

Grek keme ıeleri odaǵynyń prezıdenti Melına Travlýdyń sózinshe, ótken jyl álemdik keme qatynasy úshin túrli qıyndyqtarǵa toly kezeń boldy.

— Ekonomıkalyq, ekologııalyq jáne geosaıası turaqsyzdyq jaǵdaıynda, teńiz joldaryndaǵy shıelenister men kemelerdiń erkin qozǵalysyna tóngen qaýipterge qaramastan, grek keme qatynasy óz kóshbasshylyq rólin abyroımen atqardy, — dedi odaq prezıdenti.

Osyǵan deıin Grekııa araldaryna krýızdik saparlar baǵasy óskeni habarlandy. Elde jańa salyq engizildi. Bılik bul qarjy týrızm men ınfraqurylymdy damytýǵa jumsalady dep túsindirdi.