Álemdik rekord jáne naqty AI-sheshimder: HackAlem AI nesimen erekshelenedi
Elordada HackAlem AI hakatony ótip jatyr. Álemdik rekord ornatýdy kózdegen dodaǵa 2,5 myń adam qatysyp, jasandy ıntellekt negizinde óz jobalaryn ázirleýge kiristi. Olarǵa birneshe saǵattyń ishinde bıznes pen memlekettik sektordaǵy naqty máselelerge sheshim usynatyn AI-agent jasap shyǵý mindeti qoıylyp otyr.
Hakatonǵa 21 eldiń 157 ýnıversıteti men 54 qalasynan qatysýshylar kelgen. Olardyń arasynda stýdenttermen qatar IT salasynda jumys istep júrgen mamandar da bar. Uıymdastyrýshylardyń aıtýynsha, keıbir qatysýshylar shara ótetin jerge tańǵy saǵat tórtten bastap kezekke turǵan.
Hakatonǵa Guinness World Records ókilderi de keldi. Olar Agentic AI-hakatonyna eń kóp adam qatysqan álemdik rekordty tirkeý úshin is-sharanyń barysyn baqylap otyr.
HackAlem AI nesimen erekshelenedi
Silk Road Innovation Hub bas dırektory Áset Ábdýalıevtiń aıtýynsha, qatysýshylarǵa jalpy quny 1,5 mıllıon dollar bolatyn tehnologııalyq resýrstar berilgen. Olardyń qatarynda OpenAI men NVIDIA usynǵan API-kredıtter, sondaı-aq AI-agentterin ázirleýge múmkindik beretin Codex platformasy bar.
Bas dırektordyń sózinshe, qatysýshylar jeke de, komanda quramynda da jumys isteı alady. Olarǵa tórt-bes saǵat ishinde usynylǵan 10 baǵyttyń biri boıynsha jumys isteıtin AI-sheshim ázirleý mindeti qoıylǵan.
Tapsyrmalardy Qazaqstannyń iri kompanııalary men memlekettik uıymdary usyndy. Olardyń qatarynda Samruk-Kazyna, Halyk Bank, «Qazaqtelekom», ákimdikter jáne Ǵylym jáne joǵary bilim mınıstrligi bar. Qatysýshylar jaı ǵana startap ıdeıasyn usynbaıdy. Olar naqty uıymnyń máselesin sheshetin, jumys isteýge qabiletti AI-agent jasap kórsetýi kerek, - dedi spıker.
Jedel járdem shaqyrýdy jeńildetetin AI-joba
Uıymdastyrýshylardyń aıtýynsha, qatysýshylardyń basym bóligi – stýdentter. Solardyń biri - Nazarbaev ýnıversıtetiniń 1-kýrs stýdenti Raqymjan Toqtarhanov. Ol hakatonǵa dostarymen birge qatysyp jatyr. Onyń komandasy jedel járdem qyzmetine arnalǵan joba ázirleýde.
– Joba adamnyń qatysýyn barynsha azaıtyp, jedel járdemge avtomatty túrde ótinish jiberýge múmkindik berýdi kózdeıdi. Sonymen birge paıdalanýshy jedel járdem kóliginiń qaı jerde kele jatqanyn baqylaı alady, al ótinish bergen adamnyń mekenjaıy júıede avtomatty túrde anyqtalady. Bul adamdar úshin de, dıspetcherler úshin de yńǵaıly bolar edi. Telefon arqyly habarlasyp, ýaqyt joǵaltpaıdy, - deıdi ózi.
Stýdenttiń pikirinshe, qazirgi jasandy ıntellekt quraldary ıdeıany tehnıkalyq jaǵynan júzege asyrýdy jeńildetken. Sondyqtan komandalar úshin eń kúrdeli mindetterdiń biri – ózgelerden erekshelenetin ıdeıa tabý.
– Menińshe, komandalarǵa erekshe ıdeıa tabý qıynyraq bolýy múmkin. Al ony júzege asyrý ońaıyraq, óıtkeni ChatGPT arqyly jasalady ǵoı, - deıdi ol.
Komanda hakatonnan tájirıbe jınap qana qoımaı, jobasyn ári qaraı damytýǵa múmkindik alýdy kózdeıdi.
Al elordadaǵy IT ýnıversıtetiniń 2-kýrs stýdenti Temirlan Dosmuhambetov buǵan deıin de túrli hakatondarda baq synaǵan. Bul joly ol ýnıversıtettegi toptastarymen birge úsh adamnan turatyn komanda qurǵan.
– Buǵan deıin túrli hakatondarǵa qatysyp, baq synadym. Ýnıversıtette birge oqıtyn grýppalastarymmen hakatonǵa tirkeldik, biz úshin paıdaly bolady dep oılaımyz. Álemniń, elimizdiń túkpir-túkpirinen kelgen stýdenttermen tanysyp, pikir almasyp jatyrmyz. Bul hakatonnyń seriktesi - OpenAI kompanııasy, sondyqtan da bunyń mańyzy óte zor, – deıdi ol.
Onyń aıtýynsha, komanda hakaton barysynda usynylǵan ınfraqurylymdy paıdalanyp, belgili bir mindetti oryndaıtyn prototıp jasaýy kerek.
– Topta úsh adambyz. Adamzatqa paıda ákeletin prototıpterdi oılap tabýymyz kerek. Eger hakatondy utatyn bolsaq, sol qarajatty óz jobamyzdy jaqsartýǵa, jetildirýge jumsaımyz, - dedi ol.
Jeńimpazdardyń jobasy kompanııalarda qoldanylýy múmkin
HackAlem AI-dyń jalpy júlde qory – 200 myń dollar. Onyń 100 myń dollary 10 jeńimpaz komandaǵa beriledi. Taǵy 100 myń dollar jetekshi jasandy ıntellekt modelderin qoldanýǵa múmkindik beretin API-kredıtteri túrinde usynylady. Degenmen uıymdastyrýshylar hakatonnyń nátıjesi aqshalaı júldemen ǵana ólshenbeıtinin aıtady. Úzdik dep tanylǵan sheshimder tapsyrma bergen kompanııalar men uıymdarda is júzinde engizilýi múmkin.
– Jeńimpazdar tek aqshalaı syılyq alyp qana qoımaı, óz sheshimderin sol jobalar ázirlengen kompanııalarda tikeleı engizýge múmkindik alady. Sondyqtan baǵalaý kezinde naqty óndiristik jáne ekonomıkalyq mindetterdi sheshýge qabiletti jobalarǵa basymdyq beriledi, - dedi Silk Road Innovation Hub bas dırektory.
Álemdik rekord jańara ma
HackAlem AI uıymdastyrýshylary buǵan deıin Úndistanda Google ótkizgen hakatonda ornatylǵan rekordty jańartýdy kózdep otyr. Qazir HackAlem AI qatysýshylar sany eń kóp Agentic AI-hakatony retinde Guinness World Records rekordyna resmı túrde úmitker.
– Eger bári sátti ótse, eki-úsh kún ishinde hakatonymyzdyń álemdegi eń iri hakaton mártebesin alǵan-almaǵanyn biletin bolamyz. Hakaton AI Month aıasyndaǵy alǵashqy is-shara boldy. Jasandy ıntellekt aılyǵy aıasynda shamamen 20 is-shara ótkizilip, olarǵa 100 myńnan astam adam qatysady dep josparlapı otyrmyz, - dedi Áset Ábdýalıev.
Uıymdastyrýshylar hakatonnyń memlekettik bıýdjet qarajatynsyz, demeýshilik jáne jeke qarajat esebinen ótkizilip jatqanyn atap ótti.
Sondaı-aq, Áset Ábdýalıev hakatondy Qazaqstandaǵy jasandy ıntellekt ınfraqurylymynyń damýymen de baılanystyrady. Onyń aıtýynsha, elde NVIDIA chıpteri negizinde jasalǵan eki sýperkompıýter jumys isteıdi jáne olar álemdegi eń qýatty 500 sýperkompıýterdiń qataryna kiredi.
– Elimizde esepteý qýaty men jasandy ıntellekt tehnologııalary jańa strategııalyq resýrsqa aınalyp keledi. Osy baǵyttaǵy ınfraqurylymnyń damýy Qazaqstanǵa AI tehnologııalaryn el ishinde qoldanýmen qatar, ázirlengen sheshimder men tájirıbeni syrtqy naryqqa shyǵarýǵa múmkindik bere alady, - dedi ol.
Aıta keteıik, hakaton fınalısteri 29 qyrkúıekte Demo Day aıasynda óz jobalaryn tanystyrady. Al HackAlem AI jeńimpazdaryn marapattaý 1 qazanda Digital Bridge aıasynda ótedi.
