Álemdik rekord tirkeldi: Almaty oblysynda 1 000 túıeden quralǵan kerýen júrip ótti
QONAEV. KAZINFORM – Álemdegi eń úlken túıe kerýeni Almaty oblysy Іle aýdanynyń Kúrti aýyldyq okrýginde júrip ótti.
Kerýen quramyna 1 000 túıe engizilip, olar arnaıy daıyndalǵan 1 shaqyrymdyq joldy júrip ótti. Buǵan deıingi álemdik rekord 2022 jyly Qytaıda tirkelgen bolatyn. Ol kezde tek 365 túıe qatysqan edi. Qazaqstan bul jetistikti úsh eseden astam arttyryp, álem nazaryn ózine aýdardy.
Іs-sharaǵa Anglııadan arnaıy kelgen Gınnestiń rekordtar kitabynyń ókili Rıchard Stennıng qatysyp, kerýenniń ár qımylyn qatań baqylap otyrdy.
– Men mundaı kólemdegi túıe kerýenin birinshi ret kórip otyrmyn. Qazaqstannyń bul jetistigi tek ulttyq mádenı mura ǵana emes, búkil álemdik qazyna retinde baǵalanýy tıis, - dedi ol jetistik tirkelgen sátte.
Іs-shara barysynda ulttyq naqyshtaǵy 5 kıiz úı tigilip, qonaqtarǵa dástúrli taǵamdar usynyldy. Arnaıy fýdkort aımaǵy jumys istedi. Sonymen qatar belgili estrada juldyzdary men óńir ónerpazdary qatysqan kontserttik baǵdarlama uıymdastyryldy.
Kerýenniń qaýipsiz ári uıymdasqan túrde ótýine erekshe mán berildi. Patrýldik polıtsııa qyzmetkerleri, órt sóndirý tehnıkasy, medıtsınalyq qyzmet jáne veterınarlyq baqylaý tolyq qamtamasyz etildi. Qoǵamdyq tártipti saqtaý úshin týrnıketter ornatylyp, kórermenderdiń kerýenge jaqyndaýyna shekteý qoıyldy.
Bul bastama Almaty oblysy ákimdiginiń qoldaýymen jáne óńirdiń iri sharýashylyqtarynyń biri – «Daýlet-Beket» kompanııasynyń jetekshiligimen júzege asty.
Eske salaıyq, buǵan deıin Almatyda quraq kórpe jınaýdan álemdik rekord ornatyldy.