Álemdik rekord: Pokemon kartasy aýktsıonda 16,5 mıllıon dollarǵa satyldy
ASTANA. KAZINFORM — Sırek kezdesetin Pokemon kartasy Nıý-Djersıdegi aýktsıonda satyp alýshynyń aqysyn qosqanda rekordtyq 16,49 mıllıon dollarǵa satyldy, dep habarlaıdy Kyodo.
Kartochkany áleýmettik jelilerde mıllıondaǵan jankúıeri bar amerıkandyq bloger Logan Pol Nıý-Djersıdegi Goldin Auctions aýktsıon úıinde satylymǵa shyǵardy. Ol kartany 2021 jyly 5,27 mıllıon dollarǵa satyp alyp, Gınnestiń rekordtar kitabynyń saıtyna sáıkes «jeke satylymdaǵy eń qymbat Pokemon kartasy» ataǵyn aldy.
Gaýhar tasty tizbegi bar Pıkachý kartasynyń jeńimpazy óz júldesin alý úshin Poldyń YouTube arnasynda tikeleı efırge shyqty. Alaıda aýktsıon úıi onyń kim ekenin jarııalamady.
5 qańtarda bastalǵan satylym aldynda aýktsıon úıiniń negizin qalaýshy jáne ıesi Ken Goldın kartanyń baǵasy 2021 jyldan beri kóterilgenin jáne lot 10 mıllıon dollardan asatyn bolsa, «tań qalmaıtynyn» aıtty.
Gınnestiń rekordtar kitaby saıtynyń málimetinshe, aldyńǵy rekordtyq baǵa 2025 jyldyń tamyzynda qoıylǵan. Heritage Auctions aýktsıonynda Maıkl Djordan men Kobı Braıanttyń qoltańbasy bar saýda kartasy 12,93 mıllıon dollarǵa satylǵan edi.
Eske salaıyq, Nıý-Iorkte tabylǵan Mıkelandjelonyń 500 jyldyq eskızi 23 mln dollarǵa satyldy.