Álemdik rekord: Bir qoly, bir aıaǵy joq sportshy Býrabaı kólin júzip ótti
ASTANA. KAZINFORM – Elorda turǵyny Aqnazar Mýtalıpov apatqa ushyrap, bir qoly men bir aıaǵynan aıyrylǵan. Qazir ol protezdiń kómegimen júrip-turady, degenmen jas jigit taǵdyr tálkegine moıymaıdy. Agenttik tilshisi kópti jigerlendiretin jerlesimizben tildesken edi.
26 jastaǵy Aqnazar Mýtalıpov Qaraǵandy oblysynyń týmasy. Ol týǵan jerinde orta jáne joǵary bilim alyp, temirjolǵa jumysqa turǵan. Ókinishke qaraı, jas maman eńbek jolyn bastaı bergende qaıǵyly jaǵdaıǵa tap bolǵan.
«2018 jyly 5 sáýirde jumysta túngi aýysymda poıyz qaǵyp, bir qolym men bir aıaǵymnan aıyryldym. Júzýge kelsek, bala kezimnen unatamyn, biraq kásibı túrde aınalysamyn dep oılamadym. Qaıǵyly jaǵdaıdan keıin, júze alam ba degen oı kelip, Balqash kólinen bastadym. Júzý qolymnan kelgen soń, para sportqa bet burdym, keıin basseınge jazylyp, jattyqtyrýshymen kásibı túrde aınalysýǵa kóshtim», - dedi Aqnazar Mýtalıpov agenttik tilshisine suhbat bere otyryp.
Eren eńbek pen tógilgen ter nátıjesin kóp kúttirmedi. Aqnazar bıyl naýryzda Taraz qalasynda ótken 400 metrge erkin júzýden jarys jeńimpazy atandy.
«Sodan soń aldyma Býrabaı kólin júzip ótý maqsatyn qoıdym. Basseınde kúndelikti júzip, daıyndyqty jalǵastyrdym. Sondaı-aq, kartadan kóldiń uzyndyǵyn qarasam, shashamen 2 shaqyrym bolyp kórindi, biraq, júzip ótken soń 2,5 shaqyrym bolyp shyqty. Maqsatyma jettim, árıne qasymda jattyqtyrýshym boldy», - deıdi ol.
Jerlesimizdiń endigi armany jeke jeńisin Gınnestiń rekordtar kitabyna engizý.
«Gınnestiń resmı saıtyna kirip, zerdelep shyqtym, bir qoly men bir aıaǵy joq jandar arasynda mundaı qashyqtyqta áli eshkim júzip ótpegen. Óz rekordymdy Gınneske engizgim keledi, biraq, bári qarjyǵa kelip tireledi, qoldaý kerek. Sol úshin qazir demeýshi izdep jatyrmyn. Al Býrabaıdy tańdaǵan sebebim, buıyrsa, Gınnes rekordtar kitabyna enýge ótinim bersek, onyń ókilderi Býrabaıǵa kelip, óz kózderimen kórýi kerek. Osy oraıda men bir oqpen, eki qoıandy atqym kelim otyr. Bir jaǵynan rekord ornatý, ekinshi jaǵynan tabıǵaty ásem Býrabaıdy álemdik deńgeıde tanyta túsý. Ózińiz oılańyz, Gınnes rekordtar kitabynyń Facebook paraqshasynda 40 mln, al Instagram jelisinde 10 mln oqyrman bar», - deıdi para júzýshi.
Otandasymyzdyń aldaǵy ýaqytta para júzýden respýblıkalyq jáne halyqaralyq jarystarǵa qatysyp, basqa da ózenderdi júzip ótý jospary bar.
Sondaı-aq, Aqnazardan adamdardy jigerlendiretin keńes suraǵan edik.
«Adam eń aldymen ózine unaıtyn ispen aınalysýy kerek dep oılaımyn. Sonymen qatar aldyna maqsat qoıyp, soǵan jetý jolynda eńbektenýi tıis. Kez kelgen ispen shyn nıetpen aınalysqan jaǵdaıda, maqsatqa jetesiz», - deıdi jas jerlesimiz.
