Álemdik opera ánshisi Marııa Mýdrıak: «Qazaq valsin» Eýropa jurty súıip tyńdaıdy

Ertis boıynyń týmasy Marııa Mýdrıak 3 jasynan án salyp, 13 jasynda Djýzeppe Verdı atyndaǵy Mılan memlekettik konservatorııasyna oqýǵa túsken erekshe talant ıesi. Naýryz meıramyna oraı týǵan jerinde kontsert ótkizgen óner ıesimen az-kem suhbattasýdyń sáti túsken edi.

мудряк
Фото: Валерий Бугаев

— Marııa, sizdi týǵan jerińizde kórgenimizge qýanyshtymyz. Bul Kerekýdegi tuńǵysh kontsertińiz be?

— Kereký — kindik kesken jurtym. Munda eń alǵash 16 jasymda jeke kontsert bergenim esimde. Odan beri de birneshe márte munda boldym. Maǵan ózimniń týyp-ósken Pavlodarymda kezekti ret kontsert ótkizýge múmkindik berilgenine óte qýanyshtymyn. Sondaı-aq, «Astana balet» teatryna ózderiniń sımfonııalyq orkestrimen birge óner kórsetýge múmkindik bergeni úshin alǵysymdy bildiremin. Búgin sahnada eń áýeli óz repertýarymda oryndap júrgen shyǵarmalardy oryndadym. Motsart pen Verdıden jáne merekelik kóńil kúı syılaıtyn, jeńil tyńdalatyn týyndylardy, máselen Ardıtı, Legardyń kompozıtsııalary bar. Bul operany súıetin qaýymǵa ǵana emes, mundaı kontsertke alǵash ret kelip otyrǵan kórermenderge de unady degen oıdamyn.

— Pavlodar jeri siz úshin nesimen mańyzdy?

— Ertis-Baıan óńiri — ata-babalarymnyń mekeni bolǵan, qasıetti Otanyna aınalǵan topyraq. Munda eń jaqyn týystarym, dostarym men ustazdarym turady. Bul jerde men alǵashqy qadamdarymdy jasadym, úlken óner jolyna tústim. Ómirimdegi eń aıaýly estelikter qalǵan, mańyzy bárinen joǵary ystyq uıam bolyp qala beretini anyq.

— Opera — óńirler úshin sırek janr. Sizge jergilikti kórermender unaǵan bolar.

— Bizdiń eldiń adamdary óte qonaqjaı, qashan kelsem de qushaq jaıa qarsy alady. Kórermen retinde ónerdi syılaı biletini, mádenıetti qasterleıtini, jalpy ánshilik ónerge jyly qaraıtyny unaıdy. Munyń barlyǵyn men sahnaǵa shyqqanda da, jurt arasynda bolǵanda da birden sezinemin. Jalpy tyńdarmandardy áldebir sanatqa bólý men úshin jat uǵym. Bir adam ba, álde myń adam ba, bastysy kez kelgen aýdıtorııada barynsha tamasha etip óner kórsetsem, maqsatymnyń oryndalǵany. Ári kontsertte meılinshe kóbirek án shyrqaǵandy janym qalaıdy.

Marııa Mýdrıak
Foto: Valerıı Býgaev

Búgingi keshte qandaı týyndylardy oryndadyńyz.

— Baǵdarlamada ıtalııalyq opera, aýstrııalyq operettanyń romantıka jáne ıspanııalyq sarsýela janryndaǵy úzdik shyǵarmalardy shyrqadym. Kontsert repertýary daýys mánerimniń qalaısha damıtynymen tyǵyz baılanysty. Men daýysymdy únemi baqylap otyramyn, soǵan oraı qaı partııanyń qaı týyndydan keıin oryndalatynyn kontsert barysynda júre josparlaımyn. Al partııalardyń sany óte kóp.

— Sońǵy ýaqytta álemniń kóptegen teatrynda óner kórsetip júrgenińizdi baıqadyq. Muny gastroldik týr dep aıtýǵa bola ma?

— Joq, tipti olaı emes. Meni kópshilik alǵash Italııa jerindegi úlken sahnalarda, sonyń ishinde «La Skala» teatrynyń qoıylymdaryna qatysqan opera ánshisi retinde tanıdy. Ónerim tolysyp, sheberligim qalyptasqaly álemniń aldyńǵy qatarly teatrlarymen kelisimshart boıynsha eńbek etip júrmin. Máselen, bıylǵy maýsymda Italııanyń birneshe teatrynda rekvıem oryndaımyn. Sondaı-aq Qytaıdyń Beıjiń qalasyndaǵy bas teatrynda «Fıgaronyń úılený toıy» qoıylymynda jáne Sıan qalasyndaǵy opera teatrynda óner kórsetýim josparlanǵan.

— Qazaq tilinde án salasyz ba?

— Bala kezimde qazaq tilinde kóptegen ánderdi oryndap júrdim. Odan soń Italııaǵa oqýǵa attanǵanda Hamıdıdiń «Qazaq valsin» tańdap, kóptegen úlken sahnalarda oryndaǵanym bar. Bul shyǵarmany qazir de sheteldik teatrlarda jıi shyrqaımyn. Ásirese, Eýropa jurty «Qazaq valsin» súıip tyńdaıdy. Onyń erekshe áýeni qazaq halqynyń ulttyq kolorıtin tanyta bilýde degen oıdamyn.

mýdrıak
Foto: Valerıı Býgaev

— Qansha til bilesiz?

— Orys, aǵylshyn, ıtalııa tilderin jetik bilemin. Qazaq jáne ıspan tilderin túsinerlik deńgeıde meńgergenmin. Repertýarymda bul tilderden bólek, frantsýz, nemis tilderinde de operalar bar.

— Ýaqyt bólip, áńgimeleskenińizge rahmet. Ónerdiń shyńynan túspeńiz!

Eske sala keteıik, Álemdik opera juldyzy Naýryz meıramynda jerlesterine syılyq jasaǵanyn jazǵan edik.

Сейчас читают