Álemdik naryqta munaı baǵasy ósti
ALMATY. KAZINFORM — Izraıl men Iran arasyndaǵy jaǵdaıdyń ýshyǵýy álemdik munaı baǵasynyń ósýine áser etti.
8 maýsymda saýda-sattyq bastalǵanda Brent markaly munaıdyń tamyz aıyna arnalǵan fıýchersteri aldyńǵy saýda kúniniń jabylý baǵasymen salystyrǵanda 3,6 paıyz qymbattap, barreli 96,7 dollarǵa jetti.
WTI markaly amerıkalyq munaıdyń baǵasy da ósip, barreli 93,5 dollar boldy. Al Urals markaly munaıdyń bir barreli shamamen 86,3 dollardan satylyp jatyr.
Munaı baǵasynyń ósýine Taıaý Shyǵystaǵy jaǵdaıdyń shıelenisýi jáne Parsy shyǵanaǵynan munaı men gaz jetkizýge qatysty alańdaýshylyq sebep bolyp otyr.
Sarapshylardyń aıtýynsha, AQSh, Izraıl jáne Iran arasyndaǵy qaqtyǵys bolyp jatqan 100 kún ishinde álemdik saýda úshin strategııalyq mańyzy bar Ormýz buǵazy arqyly shamamen 1 myń keme ótken. Bul qalypty jaǵdaıda buǵaz arqyly bir aptada ótetin kemeler sanyna teń.
7 maýsym kúni keshke Iran Izraıldiń soltústik bóligine zymyrandar atty. The Times of Israel basylymynyń málimetinshe, bul — sáýir aıynan beri jasalǵan alǵashqy osyndaı shabýyl. Al Tegeran muny Izraıldiń Lıvandaǵy áreketterine jaýap dep atady.
Eske salaıyq, buǵan deıin Izraıl áskeri atysty toqtatý rejımine qaramastan Lıvannyń ońtústigindegi Nabatııa provıntsııasyna áýe soqqylaryn jasaǵanyn habarlaǵanbyz.
