Álemdik naryqta Brent baǵasy barreline 91 dollardan asty
ALMATY. KAZINFORM — Reuters málimetinshe, álemdik munaı baǵasy Ormýz buǵazy tóńiregindegi qaýip-qaterlerge baılanysty ósim kórsetip keledi.
18 tamyzdaǵy saýda-sattyq qorytyndysy boıynsha Brent markaly munaı fıýchersteri 0,17%-ǵa qymbattap, barreline 91,02 dollarǵa deıin kóterildi. Amerıkalyq WTI munaıy 0,52%-ǵa qymbattap, barreline 84,94 dollar boldy. Saýda-sattyq eki marka úshin de úsh aptada ishindegi eń joǵarǵy deńgeıde aıaqtaldy.
Taıaý Shyǵystaǵy shıelenis naryqqa yqpal etip otyr jáne tasymaldaýdyń toqtaýyna qatysty alańdaýshylyqty kúsheıte túsedi. Ótken demalys kúnderi Izraıl Lıvanǵa jańa soqqylar jasap, saldarynan 11 adam qaza tapty. Al Ormýz buǵazynda ADNOC munaı kompanııasynyń eki kemesi shabýylǵa ushyraǵany habarlanǵan edi.
Sonymen qatar Iran Parsy shyǵanaǵyndaǵy Hark aralynda ornalasqan batys termınalynda 25 kúndik shekteýden keıin munaı jóneltýdi qaıta jandandyrdy. Hark araly — Iran munaı ınfraqurylymynyń negizgi ortalyqtarynyń biri. Ondaǵy termınaldar arqyly ırandyq munaı eksportynyń shamamen 90%-y júzege asyrylady.
Odan bólek Iran men Oman Ormýz buǵazy arqyly ótetin teńiz baǵdarlarynyń kartasy boıynsha kelisimge keldi.
