Álemdik munaı tasymalyna qaýip tóndi: Iemen áskeri strategııalyq buǵaz mańynan shegindi
ASTANA. KAZINFORM — Iemen úkimetiniń qarýly kúshteri eldiń ýaqytsha astanasy sanalatyn Aden qalasynyń qorǵanysyn kúsheıtý maqsatynda Bab ál-Mandab buǵazy mańyndaǵy áskerin shegindiretinin málimdedi. Bul týraly BBC jazdy.
Iemenniń halyqaralyq deńgeıde moıyndalǵan úkimetin qoldaıtyn ońtústik qarýly kúshter Zýbab áýejaıy men Bab ál-Mandab buǵazy mańyndaǵy aýdandardan áskerı bólimshelerin shyǵarǵanyn habarlady. Áskerdi qaıta ornalastyrýdyń negizgi baǵyty retinde Aden qalasy belgilengen.
Al hýsıtterge jaqtas aqparat quraldary úkimet kúshteri tastap ketken aýmaqtardy qozǵalys jasaqtary baqylaýyna alǵanyn málimdedi. Iemen úkimetin qoldaıtyn Saýd Arabııasy ázirge bul jaǵdaıǵa qatysty resmı túsinikteme bergen joq.
Áskerdi shegindirý úkimet kúshteriniń alty aptaǵa sozylǵan qarsy shabýylynyń is júzinde aıaqtalǵanyn bildiredi. Bul áskerı operatsııanyń maqsaty hýsıtterdi Qyzyl teńiz jaǵalaýynan yǵystyryp, munaı tasymaldaıtyn mańyzdy teńiz joldarynyń birindegi qaýipsizdikti qamtamasyz etý bolǵan.
Qyrkúıek aıynda hýsıtter kútpegen shabýyl jasap, Bab ál-Mandab buǵazy mańyndaǵy birqatar aýmaqty, sonyń ishinde Perım araly men strategııalyq mańyzy bar Moha port qalasyn basyp alǵan edi. Áskerı qaqtyǵystyń ýshyǵýy álemdik munaı jetkizilimine qaýip tóndirip, myńdaǵan turǵyndy úılerin tastap ketýge májbúr etti.
Hýsıtter buǵazǵa baqylaý ornatý halyqaralyq keme qatynasyna qaýip tóndirmeıtinin málimdep otyr. Alaıda qozǵalys Saýd Arabııasyna tıesili kemelerge shabýyl jasaýdy jalǵastyratynyn da eskertken.
Qaqtyǵystyń shıelenisýi álemdik munaı baǵasynyń ósýine áser etti. Ormýz buǵazynyń is júzinde jabylýyna ákelgen AQSh pen Izraıldiń Iranǵa qarsy áskerı qaqtyǵysynan keıin Bab ál-Mandab buǵazynyń strategııalyq mańyzy arta tústi. Osy jaǵdaıǵa baılanysty Saýd Arabııasy munaı eksportyn Qyzyl teńiz arqyly qaıta baǵyttaýǵa májbúr bolǵan.
Jaǵdaıdyń ýshyǵýyna baılanysty Saýd Arabııasy hýsıtterdiń pozıtsııalaryna júzdegen áýe soqqysyn jasady. Buǵan jaýap retinde qozǵalys Saýd Arabııasynyń qalalary men ınfraqurylym nysandaryna drondar jáne zymyrandar arqyly kóptegen shabýyl uıymdastyrǵan.
BUU baǵalaýynsha, Iemendegi qaqtyǵystyń qaıta órshýi saldarynan shamamen 330 myń adam turǵylyqty jerin tastap ketýge májbúr bolǵan. Sondaı-aq júzdegen adamnyń qaza tapqany habarlandy.
Buǵan deıin hýsıtter Er-Rııad qalasyndaǵy áýejaı men qarjy ortalyǵyna zymyranmen soqqy jasaǵanyn málimdegen edi.