Álemdik munaı qory nebári úsh aıǵa jetedi - Goldman Sachs
ASTANA. KAZINFORM – Goldman Sachs málimetinshe, álemdik munaı qory kúrt azaıyp, segiz jyldyq eń tómengi deńgeıge jaqyndap keledi, al Ormýz buǵazy arqyly jetkiziletin munaı kólemi shekteýli bolǵandyqtan onyń sarqylý qarqyny alańdaýshylyq týdyryp otyr, dep habarlaıdy Reuters.
Álemdegi eń iri ınvestıtsııalyq bankterdiń biriniń málimetinshe, qoımalardaǵy munaıdyń jalpy álemdik qory tek 101 kúndik tutynýǵa jetedi. Bul kórsetkish mamyr aıynyń sońyna qaraı 98 kúnge deıin tómendeýi múmkin.
Banktiń baǵalaýynsha, munaı ónimderiniń álemdik qory AQSh pen Izraıldiń Iranǵa qarsy soǵysyna deıingi 50 mln dollardan qazirgi kezde 45 mln dollarǵa deıin qysqarǵan.
Goldman Sachs atap ótkendeı, jalpy álemdik qor «osy jazda eń tómengi operatsııalyq deńgeıge jetýi ekitalaı, biraq keıbir aımaqtarda jáne keıbir ónimder boıynsha munaı qorynyń azaıýy men jetkizilim shyǵyndary alańdaýshylyq týdyryp otyr».
S&P taldaýshylarynyń málimetinshe, suranystyń tómendeýine qaramastan sáýir aıynda munaı qory táýligine orta eseppen 6,6 mln barrelge tómendedi, bul baqylaý júrgizýdiń búkil tarıhynda rekordtyq eń úlken ekinshi tómendeý. Munaıǵa suranystyń kúrt tómendeýi koronavırýs pandemııasy kezinde ǵana boldy.
Financial Times atap ótýinshe, negizgi áserdi ázirge kóbine Azııa elderi sezingenimen, AQSh-taǵy benzın qory jazǵy demalys maýsymynyń shyńynda tarıhı tómen deńgeıge jetýi múmkin.
Aıta keteıik, buǵan deıin munaı baǵasy AQSh pen Iran arasyndaǵy kelissózdiń ótkizilmeýine baılanysty kúrt óskenin jazdyq.
Sondaı-aq Iran AQSh-tyń teńiz blokadasy aıasynda munaı qoımalarynyń tolyp ketýine jol bermeý úshin munaı óndirý kólemin qysqartyp jatqanyn jazdyq.
Qazaqstan munaı óńdeýdi 39,2 mln tonnaǵa deıin arttyrýdy kózdeıdi.
