Álemdik munaı baǵasy shildede aıtarlyqtaı ósti
ASTANA. KAZINFORM — Álemdik munaı baǵasy juma kúngi saýda-sattyqty 1%-dan astam ósimmen aıaqtap, shilde aıyn naýryzdan bergi eń joǵary kórsetkishpen qorytyndylady. Bul týraly Reuters habarlady.
Saýda qorytyndysy boıynsha Brent markaly munaıdyń baǵasy 1,3% ósip, barreli 90,12 dollar boldy. Al amerıkalyq WTI munaıy 1,5% qymbattap, barreli 84,67 dollarǵa jetti. Shilde aıynyń qorytyndysynda Brent shamamen 24%, al WTI 21% ósti.
Reuters agenttiginiń jazýynsha, munaı baǵasynyń ósýine Taıaý Shyǵystaǵy geosaıası ahýaldyń shıelenisýi jáne negizgi tasymal baǵyttarynda munaı jetkizilimine tóngen qaýip áser etken. Buǵan qosa, AQSh-taǵy munaı qorynyń 2018 jyldan bergi eń tómengi deńgeıge deıin qysqarýy jáne eldegi óndiris kóleminiń azaıýy da baǵanyń ósýine yqpal etken.
Sonymen qatar sarapshylar munaı naryǵyndaǵy qubylmalylyqtyń áli de saqtalyp otyrǵanyn aıtady. Investorlar Qyzyl teńiz ben Ormýz buǵazyndaǵy keme qatynasyna qatysty jaǵdaıdy, sondaı-aq álemdik munaı suranysynyń bolashaǵyn jiti baqylap otyr.
Reuters saýalnamasyna qatysqan sarapshylardyń boljamynsha, 2026 jyly Brent munaıynyń ortasha baǵasy barreline 85,22 dollar bolýy múmkin. Bul — buǵan deıingi boljamnan joǵary kórsetkish.
Eske salaıyq, buǵan deıin Taıaý Shyǵystaǵy geosaıası ahýaldyń kúrdeliligine qaramastan, juma kúni álemdik munaı baǵasy tómendegenin jazǵanbyz.
