Álemdik munaı baǵasy apta boıy quldyrap jatyr
ALMATY. KAZINFORM — Juma kúni tańerteń álemdik munaı baǵasy azdap tómendedi.
13 qarasha tańerteńgi saýda qorytyndysy boıynsha, Brent markaly munaıdyń qańtar aıyndaǵy fıýchersteri barreline 95,65 dollar boldy. Bul aldyńǵy kórsetkishten 0,17 dollarǵa nemese 0,18%-ǵa tómen.
Oilprice.com málimetinshe, amerıkalyq WTI markaly munaı fıýchersteri barreline 88,35 dollar deńgeıinde saýdalandy. Onyń baǵasy 0,39 dollarǵa nemese 0,44%-ǵa arzandady.
Osylaısha, munaıdyń eki negizgi túri de ekinshi apta qatarynan arzandap otyr.
Al reseılik Urals markaly munaıdyń baǵasy barreline 72,18 dollar boldy. Bul 0,02 dollarǵa nemese 0,03%-ǵa joǵary.
Munaı naryǵyndaǵy ahýal Ormýz buǵazyndaǵy keme qatynasyna tóngen qaýip-qaterlerge baılanysty áli de turaqsyz.
11 qarashada Iemenniń «Ansar Allah» qozǵalysy (hýsıtter) Saýd Arabııasyndaǵy Er-Rııad halyqaralyq áýejaıy men ıAnbý qalasy mańyndaǵy munaı ınfraqurylymyna soqqy jasaǵanyn málimdedi.
Sonymen qatar 11 qarasha, sársenbi kúni Abý-Dabıde Reseı, Ýkraına jáne AQSh arasyndaǵy eki kúndik úshjaqty kelissózder aıaqtaldy.
Kezdesýdiń basty praktıkalyq nátıjesi — tutqyndardy aýqymdy kólemde almasý týraly aldyn ala kelisimge qol jetkizý boldy.