Álemdik kóshbasshylar Iranǵa kóńil aıtyp jatyr
ASTANA. KAZINFORM – Taıaý Shyǵystaǵy elderdiń jáne ózge de memleketterdiń kóshbasshylary Iran prezıdenti Ibrahım Raısıdiń qazasyna baılanysty kóńil aıýda.
CNN telearnasynyń málimetinshe, Irannyń burynǵy prezıdenti Hasan Rýhanı apattan qaza tapqan Ibrahım Raısıdiń, Syrtqy ister mınıstri jáne ekıpajda bolǵan ózge de jolaýshylardyń týǵan-týystaryna kóńil aıtty.
Úndistan premer-mınıstri Narendra Modı H áleýmettik paraqshasynda bylaı dep jazdy: «Iran Islam Respýblıkasynyń prezıdenti Seııd Ibrahım Raısıdiń qazasyna qatty qaıǵyryp jatyrmyn. Onyń Úndi-Iran arasyndaǵy ekijaqty qarym-qatynastaryn nyǵaıtýǵa qosqan úlesi árqashan este qalady. Onyń otbasy men Iran halqyna shyn júrekten kóńil aıtamyn. Úndistan osy qaıǵy-qasiret kezinde Iranǵa qoldaý kórsetedi».
Irak premer-mınıstri Muhammed Shıa as-Sýdanı H áleýmettik paraqshasynda Irannyń joǵarǵy basshysy Aıatolla Alı Hameneıge jáne onyń úkimetine: «Biz osy aýyr qaıǵyly oqıǵada baýyrlas Iran halqymen jáne Islam Respýblıkasyndaǵy quzyrly organ basshylarymen yntymaqtasamyz» degen jazba qaldyrdy.
Pákistan premer-mınıstri Shahbaz Sharıf: «Pákistan aza tutý kúnin jarııalaıdy jáne prezıdent Raısı men onyń seriktesterine kórsetilgen qurmet retinde Tý tómen túsiriledi», dedi.
Ózbekstan basshysy Shavkat Mırzıeev Iran prezıdenti Ibrahım Raısıdiń áýe apatynan qaıtys bolýyna baılanysty Iran halqy men eldiń joǵary lıderi Álı Hameneıge kóńil aıtty. Shavkat Mırzıeev kóńil aıtý jedelhatynda Ózbekstan men Iran arasyndaǵy jan-jaqty yntymaqtastyqty jáne ózara tıimdi seriktestikti damytýǵa zor úles qosqan Ibrahım Raısı jaıly jarqyn estelik eki el halyqtarynyń júreginde máńgi saqtalatynyn atap ótti.
Ázerbaıjan Respýblıkasynyń prezıdenti Ilham Álıev Iran Islam Respýblıkasynyń prezıdenti Seıed Ibrahım Raısıdiń, Iran SІM basshysy Hoseın Amır Abdýllahııannyń jáne ózge de ekıpaj músheleriniń tikushaq apatynan qaıtys bolýyna baılanysty Irannyń joǵarǵy kóshbasshysy Aıatolla Seıed Alı Hameneıge kóńil aıtty.
«Baýyrlas Iran Islam Respýblıkasy halqynyń bastan ótkergen aýyr qazasy bizdiń kóńilimizdi túsirdi. Iran halqy ómir boıy óz eline janqııarlyqpen jáne adal qyzmet etken kórnekti memleket qaıratkerinen aıyryldy. Onyń jarqyn beınesi árqashan bizdiń júregimizde saqtalady. Qaıǵyly sátte Irannyń baýyrlas halqyna shydamdylyq tanytýǵa shaqyryp, jeke ózimniń atynan jáne ázerbaıjan halqynyń atynan qaza tapqandardyń otbasylary men jaqyndaryna, búkil Iran halqyna kóńil aıtamyn», - delingen kóńil aıtý jedelhatynda.
Armenııa Respýblıkasynyń prezıdenti Vaagn Hachatrıan Iran Islam Respýblıkasy prezıdentiniń jáne onyń senimdi ókilderiniń tikushaq apatynan qaıtys bolýyna baılanysty Iran úkimeti men halqyna kóńil aıtty.
«Meni Iran Islam Respýblıkasynyń prezıdenti Seıed Ebrahım Raısı, Syrtqy ister mınıstri Hoseın Amır Abdollahııan jáne basqa da sheneýnikter qaza tapqan tikushaq apaty týraly qorqynyshty habar qatty eseńgiretti. Irannyń úkimeti men baýyrlas halqyna shyn júrekten kóńil aıtamyn. Biz Iran halqynyń qaıǵysymen bólisemiz jáne osy qıyn sátte tózimdilik tileımiz», - dep jazdy Hachatýrıan óziniń H áleýmettik paraqshasynda.
Venesýela prezıdenti Nıkolas Madýro Iran Islam Respýblıkasy prezıdentiniń qaıtys bolǵany týraly qaraly jańalyqqa abdyrap qalǵanyn jetkizdi. Madýro: «Biz Bolıvar jerinen Irannyń joǵarǵy basshysy Aıatolla Alı Hameneıge qaıǵyryp kóńil aıtamyz», - dedi.
Birikken Arab Ámirlikteriniń prezıdenti Muhammed ıbn Zaıd ıbn Sultan Ál-Nahaıan apatta qaza tapqandardyń otbasylaryna shyn júrekten kóńil aıtyp, «BAÁ osy qıyn ýaqytta Iranmen birge aýyr qazany bólisedi», dep málimdedi.
Qatar ámiri Tamım ıbn Hamad Ál Tanı Raısı men Amır Abdollahııan qaıtys bolǵanyna baılanysty Iran Islam Respýblıkasynyń úkimeti men halqyna shynaıy kóńil aıtty.
Sırııa prezıdenti Bashar Asad Iranǵa kóńil aıtyp, «Raısı Sırııa men Iran halyqtaryna paıda ákeletin qarym-qatynasty nyǵaıtýǵa aıtarlyqtaı úles qosty», - dep málimdedi.
Qytaı Halyq Respýblıkasynyń Syrtqy ister mınıstri Van I de Iran Prezıdenti Ibrahım Raısıdiń ólimine qatysty málimdeme jasady.
«Kelissózder barysynda biz Iran Prezıdenti Aıatolla Seıed Ibrahım Raısıdiń tikushaq apatynan qaıtys bolǵanyn resmı túrde rastaǵanyn bildik. Qytaı osyǵan baılanysty qatty qaıǵyrady. Biz Iran úkimetine jáne onyń halqyna qaıǵyryp kóńil aıtamyz. Prezıdent I. Raısı men Syrtqy ister mınıstri Hoseın Amır Abdollahııan Qytaı-Iran qarym-qatynasy jáne aımaqtaǵy dostyq yntymaqtastyqtyń damýyna mańyzdy úles qosty», - dedi búgin Van I Qazaqstanǵa resmı sapary barysynda.
Sondaı-aq, Qytaıdyń Syrtqy ister mınıstri apattan keıin qytaı tarapy qutqarý jumystaryna belsendi kómek kórsetkenin aıtty.
«Biz Iran tarapyna qajettiniń bárin berýge daıynbyz. Iran úkimeti men halqy bul qıyn kezeńdi jeńe alatynyna senimdimiz», - deıdi ol.
Eske sala keteıik, Iran prezıdenti mingen tikushaq 19 mamyrda Ázerbaıjanmen shekaralas Verzegan qalasyna jaqyn mańda apatty jaǵdaıda qondy. Keıinirek oqıǵa ornynan túsirilgen vıdeolar tarady. Irandyqtar prezıdent I. Raısı men onyń serikteriniń densaýlyǵy úshin duǵa etti.
Al búgin tikushaq qulaǵan aımaqtyń jergilikti basylymdary prezıdent pen onyń serikteriniń qaza tapqanyn rastady. Tikushaq bortynda Joǵarǵy Kóshbasshynyń ókili jáne Tebrız juma namazynyń ımamy, Syrtqy ister mınıstri Hoseın Amır Abdollahııan, Shyǵys Ázerbaıjan gýbernatory Malek Rahmatı, Prezıdenttik qaýipsizdik bólimshesiniń qolbasshysy, general Seıed Mahdı Mýsavı jáne tikushaqtyń basqa da ekıpaj músheleri bolǵan.
