Álemdik energetıkalyq daǵdarys 2027 jylǵa deıin sozylýy múmkin – HEA basshysy
ASTANA. KAZINFORM – Halyqaralyq energetıka agenttiginiń (HEA) atqarýshy dırektory Fatıh Bırol álemdik energetıkalyq daǵdarys 2027 jyly da jalǵasýy múmkin ekenin boljady, dep habarlaıdy Anadolu agenttigi.
Bırol Ystanbulda ótetin COP31 klımattyq konferentsııasyna daıyndyq aıasynda uıymdastyrylǵan ınvestıtsııalyq sammıtte sóılegen sózinde álemdik energetıka naryǵyndaǵy qazirgi jaǵdaı men memleketterdiń saıasaty jaǵdaıdyń jaqyn arada qalypqa keletinine úmittenýge negiz bermeıtinin aıtty.
– 2027 jyly jaǵdaı qalypqa keledi dep optımıstik kózqaras tanyta almaımyn. Bolyp jatqan oqıǵalarǵa barynsha oń kózqaraspen qaraýǵa tyrysqannyń ózinde, buǵan senimdi dálel taba almaı otyrmyn, – dedi HEA basshysy.
Onyń aıtýynsha, energetıkalyq daǵdarystyń saldary kelesi jyly da seziledi.
– Jańa qıyndyqtar týyndamasa, álem áli de jarasyn jazýǵa tyrysyp jatqan kezde bul daǵdarys 2027 jyly da qandaı da bir túrde jalǵasady, – dep tolyqtyrdy Bırol.
Agenttik basshysy Ormýz buǵazy tóńiregindegi daǵdarys energetıka salasyna ǵana emes, ekonomıka men aýyl sharýashylyǵyna da áser etip otyrǵanyn atap ótti. Qalyptasqan jaǵdaıda úkimetter, kompanııalar men ınvestorlar qysqa jáne uzaq merzimdi strategııalaryn qaıta qaraýǵa májbúr.
Bırol qazirgi jaǵdaıdy 1973 jáne 1979 jyldardaǵy munaı daǵdarystarymen de salystyryp kórdi. Onyń aıtýynsha, sol kezeńder atom energetıkasynyń damýyna jáne avtokólikterdiń otyn tıimdiligin arttyrýǵa yqpal etken.
HEA basshysy Túrkııada ótetin COP31 klımattyq konferentsııasyna da toqtaldy. Ol álemdik energııa tutyný qurylymyndaǵy elektr energııasynyń úlesin qazirgi 23 paıyzdan 2035 jylǵa qaraı 35 paıyzǵa deıin arttyrýdy usyndy.
Onyń pikirinshe, elektr energııasyn paıdalanýdy keńeıtý energetıkalyq qaýipsizdikti nyǵaıtyp, sonymen birge zııandy shyǵaryndylardy azaıtýǵa múmkindik beredi.
Bırol elder Antalıadaǵy sammıtte bul bastamany qoldaıdy dep úmittenetinin jetkizdi. Onyń aıtýynsha, memleketterdiń qatysý deńgeıi men elektrlendirý máselesi boıynsha kelisimge qol jetkizý COP31 konferentsııasynyń tabystylyǵyn baǵalaıtyn eki negizgi kórsetkish bolmaq.
Buǵan deıin HEA basshysy Fatıh Bırol Iran, AQSh jáne Izraıl arasyndaǵy qaqtyǵysty álem tarıhyndaǵy eń iri energetıkalyq daǵdarystyń sebebi dep ataǵan bolatyn. Onyń sózinshe, Ormýz buǵazy arqyly keme qatynasynyń buzylýy álemdik naryqtarǵa munaı men suıytylǵan tabıǵı gaz jetkizýdi edáýir qıyndatqan.
Aıta keteıik, Qazaqstan energetıkasyn aldaǵy jyldary qandaı ózgeris kútip turǵanyn sarapshydan surap-bilgen edik.
