Álemdik ekonomıkanyń ósimi 2026 jyly 2,8 paıyzǵa deıin baıaýlaıdy
ASTANA. KAZINFORM — Álemdik ekonomıkanyń ósimi 2025 jylǵy 3,4 paıyzdan 2026 jyly 2,8 paıyzǵa deıin baıaýlap, keıin 2027 jyly qaıtadan 3,1 paıyzǵa deıin qalpyna keledi. Mundaı boljamdy sársenbi kúni Ekonomıkalyq yntymaqtastyq jáne damý uıymy (EYDU) jarııalaǵan. Bul týraly Sınhýa agenttigi jazdy.
EYDU-nyń «Ekonomıkalyq sholýynda» atap ótilgendeı, álemdik ekonomıka 2026 jylǵa kóptegen sarapshylar kútkennen de myqty kórsetkishtermen qadam basqanymen, Taıaý Shyǵystaǵy qaqtyǵys onyń bolashaǵyn aıqyndaıtyn basty faktorǵa aınaldy.
Uıym sarapshylarynyń pikirinshe, qaqtyǵystyń qalaı órbıtini ázirge belgisiz, al onyń ekonomıkalyq saldary áskerı is-qımyldar aıaqtalǵannan keıin de biraz ýaqyt boıy sezilýi múmkin.
Osyǵan baılanysty EYDU eki yqtımal damý stsenarııin usyndy: qysqa merzimdi jaǵymsyz áserlermen shekteletin ýaqytsha turaqsyzdyq jáne saldary aýqymdy ári uzaqqa sozylatyn turaqsyzdyq.
AQSh pen Iran arasyndaǵy beıbit kelisimge qol jetkizý múmkindigi artyp, 2026 jyldyń ortasynan bastap energııa tasymaldaýshylar baǵasy birtindep tómendeıdi degen bazalyq stsenarııge sáıkes, EYDU álemdik ekonomıkanyń ósimi 2025 jylǵy 3,4 paıyzdan 2026 jyly 2,8 paıyzǵa deıin baıaýlap, 2027 jyly 3,1 paıyzǵa deıin qalpyna keledi dep boljap otyr.
Eske sala keteıik, buǵan deıin álemdik ekonomıkanyń baıaýlaýynyń ózi munaı usynysyndaǵy shyǵyndardyń ornyn toltyrýǵa jetkiliksiz bolýy múmkin ekenin jazdyq.
