Álemdik Dota 2 alpaýyttary Astanaǵa keldi
ASTANA. KAZINFORM – Astana halyqaralyq áýejaıy «Bolashaq oıyndary – 2026» (GOTF 2026) powered by Samruk-Kazyna halyqaralyq týrnırine qatysýshylardy qarsy alýdy jalǵastyryp jatyr. Bul týraly Týrızm jáne sport mınıstrligi habarlady.
Bul joly elordaǵa álemdik Dota 2 arenasynyń alpaýyt komandalary – Xtreme Gaming jáne Vici Gaming keldi. Eki komanda da The International týrnıriniń fınalynda óner kórsetip, halyqaralyq deńgeıdegi eń bedeldi jarystarda joǵary nátıjelerimen tanylǵan.
Xtreme Gaming Qazaqstanǵa «Bolashaq oıyndarynyń» qazirgi chempıony retinde keldi. Komanda sapynda Ame, NothingToSay, Xxs, fy jáne xNova óner kórsetedi. Sonymen qatar ujym The International 2026 týrnırine tikeleı joldama alǵan. Al Vici Gaming Dota 2 tarıhyndaǵy eń tanymal klýbtardyń biri sanalady. Komanda birneshe márte iri halyqaralyq týrnırlerde joǵary nátıje kórsetip, The International jarysynyń fınalyna deıin jetken.
Budan bólek, Astanaǵa Team Resilience jáne Zero Tenacity komandalary da keldi. Olar MOBA PC Dota 2 Presented by Bank CenterCredit dıstsıplınasynda chempıondyq ataq úshin baq synaıdy.
Atalǵan týrnırde Qazaqstan namysyn Rune Eaters komandasy qorǵaıdy. Komanda quramynda Danııal Álibaı, Ábdimálik Saılaý, Álim Bespaev, Aıbek Toqaev jáne Nıkıta Ostahov óner kórsetedi.
Sondaı-aq elordaǵa DIGA Esports komandasy da keldi. Qazaqstandyq ujym Battle Royale – PUBG: BATTLEGROUNDS Presented by Alatau City Bank dıstsıplınasynda el namysyn qorǵaıdy.
Dota 2 týrnırine barlyǵy 16 komanda qatysyp, 1 mıllıon AQSh dollary kólemindegi júlde qoryn sarapqa salady. Oıyndar 2-5 tamyz kúnderi Jaqsylyq Úshkempirov atyndaǵy Jekpe-jek saraıynda ótedi.
Al Battle Royale – PUBG: BATTLEGROUNDS Presented by Alatau City Bank jarystary 31 shilde men 2 tamyz aralyǵynda Beeline Arena Ulttyq tennıs ortalyǵynda uıymdastyrylady.
«Bolashaq oıyndary – 2026» (GOTF 2026) powered by Samruk-Kazyna halyqaralyq mýltısport týrnıri 29 shilde men 9 tamyz aralyǵynda Astanada ótedi. Dúbirli dodaǵa 50-den astam elden 800-den astam sportshy qatysady.
Elordaǵa álemdegi jetekshi fıdjıtal jáne kıbersport komandalary kelgenin jazǵan edik.
