Álemdik dodalarda júldeger atanǵan batysqazaqstandyq sportshylardyń 70 paıyzy — qyzdar
ORAL. KAZINFORM — Batys Qazaqstan oblysynda 100-den astam sportshynyń anasyna qurmet kórsetildi.
«Rahmet, ana!» atty taǵylymdy merekelik kesh barysynda el namysyn dúbirli dodalarda abyroımen qorǵap júrgen sportshylardyń analaryna erekshe iltıpat bildirildi. Názik jandy sportshylar men olardyń bapkerleri de umyt qalǵan joq.
Ádette kópshilik nazarynda sportshylardyń jeńisi men jetistigi kórinis tabatyny belgili. Alaıda sol tabystyń bastaýynda ananyń tálim-tárbıesi, senimi men qoldaýy jatqany eskerile bermeıdi. Atalmysh is-shara tasada qalyp júrgen sol eńbekti el aldynda moıyndaýdyń jarqyn úlgisine aınaldy.
Kesh qonaqtaryn jergilikti ónerpazdar ásem áýenmen qarsy alyp, merekelik kóńil-kúı birden sezildi. Zal ishinde el namysyn qorǵap júrgen chempıondar men olardyń analarynyń sýretteri qoıylǵan arnaıy kórme uıymdastyryldy. Saltanatty jıyn bastalǵan shaqta keshtiń basty qonaqtary qyzyl kilemmen júrip ótti. Árqaısysy jeke-jeke ortaǵa shaqyrylyp, zal toly kórermenniń qoshemetine bólendi. Bul sát analar úshin de, sportshylar úshin de umytylmas áserge toly boldy.
Batys Qazaqstan oblystyq dene shynyqtyrý jáne sport basqarmasynyń basshysy Baqdáýlet Sábıtov tabys bıiginen kórinip júrgen ul-qyzdardy tárbıelep ósirgen analar men sportshy arýlarǵa alǵys bildirdi.
— Aqylyna kórki saı, ıbalylyǵy men qaısarlyǵy qatar órilgen qazaq arýlary el namysyn árdaıym bıik ustap keledi. El tarıhynda erligimen óshpes iz qaldyrǵan qaharman qyzdarymyz Mánshúk Mámetova men Hıýaz Dospanova — sonyń aıqyn dáleli. Búginde sol ójettik pen tabandylyqtyń jalǵasyn óńirdiń sportshy qyzdary tanytyp otyr. Ótken jyly álemdik jáne qurlyqtyq jarystarda top jaryp, júldeger atanǵan óńir sportshylarynyń 70 paıyzy qyzdar bolýy — úlken maqtanysh ári óńir sportynyń damýyndaǵy aıryqsha jetistik. Sportshy arýlardyń boıyndaǵy ójettilik pen eljandylyq — analar tárbıesiniń jemisi. Búginde óńirde 17 myńǵa jýyq adam sportpen turaqty aınalysady. Sonyń 40 paıyzdan astamy — názik jandylar. Bul qyzdarymyzdyń tek sulýlyq pen náziktiktiń ǵana emes, qaısarlyq pen qajyr-qaırattyń da sımvoly ekenin kórsetedi, — dedi basqarma basshysy.
Eske sala keteıik, budan buryn Oralda festıval aıasynda qusbegilikten Qazaqstan chempıonaty máresine jetkenin jazǵan edik.