Álemdik dinder kóshbasshylary seziniń deklaratsııasy qabyldandy

ASTANA. KAZINFORM – Búgin elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder kóshbasshylary VIII Ceziniń deklaratsııasy qabyldandy.

- Sez nátıjeli boldy dep aıtýǵa tolyq negiz bar. Forým qatysýshylarynyń nazaryna osy qujattyń jobasy usynyldy. Deklaratsııa jobasy jumys tobynda jáne Álemdik jáne dástúrli dinder lıderleri Sezi hatshylyǵynyń otyrysynda egjeı-tegjeıli talqylandy. Osy oraıda kelip túsken usynystar eskerildi. Deklaratsııanyń negizgi erejeleri mádenıetaralyq jáne dinaralyq dıalogty nyǵaıtýǵa tyń serpin beretinine, sondaı-aq qazirgi álemdegi syn-qaterler men problemalarǵa qatysty is-qımyl jasaý aıasynda biryńǵaı qadamdardy pysyqtaýǵa negiz bolatynyna úmittenemiz, - dedi Álemdik jáne dástúrli dinder lıderleri Sezi hatshylyǵynyń basshysy – Qazaqstan Senatynyń tóraǵasy Máýlen Áshimbaev.

Onyń aıtýynsha, deklaratsııada Álemdik jáne dástúrli dinder kóshbasshylarynyń toǵyzynshy Sezin ótkizý merzimi de qamtyldy.

- Bul rette kelesi Sezdi 2028 jyly Astanada ótkizý usynyldy, - dedi M.Áshimbaev.

Atap aıtqanda, jıyn barysynda Álemdik jáne dástúrli dinder kóshbasshylarynyń VIII Ceziniń delegattary bul usynysqa qoldaý bildirdi.

Aıta keteıik, 16 qyrkúıekte Sezd aıasynda QR Parlamenti Senatynyń tóraǵasy, Álemdik jáne dástúrli dinder lıderleri Sezi Hatshylyǵynyń basshysy Máýlen Áshimbaevtyń tóraǵalyǵymen Hatshylyqtyń XXIII otyrysy ótti. 

Sonymen qatar, Astanada BUU Órkenıetter alıansy aıasynda dinı nysandardy qorǵaý jónindegi arnaıy sessııa ótti. 

Al 17 qyrkúıekte elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder kóshbasshylary VIII Ceziniń jumysy bastalǵan edi.