Álemdik deńgeıdegi sýmo ańyzy Hakýho Se Astanada sheberlik saǵatyn ótkizdi

ASTANA. KAZINFORM — Astanaǵa aty ańyzǵa aınalǵan sýmo ókili, mońǵol balýany Hakýho Se keldi. Bul týraly Sport komıtetiniń baspasóz qyzmeti habarlady. 

Sapary aıasynda ol Qazaqstandaǵy sýmo quramasynyń sportshylarymen kezdesti. Sonymen qatar QR sýmo kúresi qaýymdastyǵynyń ókilderimen sheberlik sabaǵy men erkin pikir almasý ótkizdi.

Sondaı-aq, Hakýho Se elorda ákimi Jeńis Qasymbekpen, Týrızm jáne sport mınıstrliginiń basshylyǵymen, bıznes-qoǵamdastyq jáne Ulttyq Olımpıada komıtetiniń ókilderimen kezdesti. Kelissózder barysynda Qazaqstandaǵy sýmo kúresiniń damý tetikteri talqylandy.

Іs-sharaǵa Qazaqstan Respýblıkasy Týrızm jáne sport mınıstriniń orynbasary Serik Jarasbaev qatysty. Óz sózinde ol ataqty sportshynyń álemdik sport tarıhyna qosqan zor úlesin atap ótti.

— Sizdiń kóptegen jeńisterińiz ben teńdesi joq sporttyq rýhyńyz búkil álem boıynsha mıllıondaǵan adamdy, sonyń ishinde qazaqstandyqtardy da shabyttandyrady, — dedi mınıstr orynbasary.

Hakýho Mońǵolııadan shyqqan, ákesi — 1968 jylǵy erkin kúresten Olımpıada oıyndarynyń kúmis júldegeri.

Sýmodaǵy úzdik jetistikteriniń arqasynda ol iri týrnırlerde 45 ret jeńiske jetip, kásibı sýmodaǵy rekord ıegeri retinde tarıhqa endi. Sheberligi men sportty damytýǵa qosqan úlesi úshin Hakýho sýmo tarıhyndaǵy eń ataqty balýan atanǵan.

Ol Mońǵolııadan shyqqan tórtinshi sheteldik jáne osy elden shyqqan ekinshi sportshy retinde sýmodaǵy eń joǵary dáreje — ekodzýna ataǵyna ıe bolǵan. 

Aıta ketelik «Qaırat» – «Real Madrıd» matchynyń bıletteri 4 saǵat ishinde satylyp ketti.