Álemdik brendtermen jumys isteıtin qazaqstandyq kıbermodel ınklıýzııany damytýda

«Báriniń qoly bar, al seniń qolyń qaıda?»

Apple, Samsung, Yandex, YSL Beauty sekildi álemdik brendtermen jumys istegen Aıman Moldabekova búginde Inclusive People jobasyn damytyp, Forbes Kazakhstan basylymynyń «30 jasqa deıingi 30 tulǵa» reıtıngine engen. Alaıda bul jetistikterdiń artynda ózin qabyldaý jolyndaǵy uzaq izdenis jatyr.

Aıman oń qolynyń bilezik tusynan tómengi bóligi joq bolyp dúnıege kelgen. Bala kezinde munyń sebebin túsinbeı, ózin qatarlastarymen jıi salystyratyn. Ásirese mektepte ózgelerden erekshelenetinin seziný oǵan ońaı bolmaǵan.

– Mektepte oqyp júrgende ózimdi jaısyz sezinetinmin. Basqa balalardyń eki qoly bar ekenin kórip, ózime ne bolǵanyn túsinbeıtinmin. «Báriniń qoly bar, al seniń qolyń qaıda?» dep ózime suraq qoıdym. Biraq sol ýaqytta rezeńkeden jasalǵan, syrt kózge ádemi kórinbeıtin protezim boldy. Ony múlde sheshpeı, qysylatynmyn, – dep eske alady ol.

Kezdeısoq sapardan bastalǵan modeldik mansap

Mektepten keıin Aıman Almaty energetıka jáne baılanys ýnıversıtetine oqýǵa túsip, jylý energetıkasy mamandyǵyn tańdady. Alaıda dıplom alǵan soń salada nebári eki apta jumys istep, mamandyǵynyń ózine jaqyn emes ekenin túsingen. Keıin keńse menedjeri bolyp ornalasyp, qyzmet babymen Ystanbulǵa issaparǵa barady. Dál osy sapar onyń ómirine jańa baǵyt syılaǵan.

– Kompanııa Ystanbulǵa jumys isteýge jiberdi. Sol jerde sán ındýstrııasynyń ókilderi meni baıqap qaldy, – dedi ol.

Aımannyń modeldik mansabyna 2016 jyly bolǵan taǵy bir oqıǵa da áser etti. Sol jyly oǵan 3D-prınterde jasalǵan, tartý kúshimen jumys isteıtin protez ornatyldy. Osydan keıin ol fotosessııalarǵa qatysyp, sán kórsetilimderine shyǵa bastady. Keıin Mercedes-Benz Fashion Week sekildi halyqaralyq sharalarda boı kórsetti.

Ýaqyt óte kele Aıman protezdi óziniń ereksheligin jasyrý úshin emes, qajet bolǵan jaǵdaıda ǵana qoldana bastady.

– Buryn aınalamdaǵy adamdardyń pikirine qatty táýeldi boldym. Іshki senimdi qalyptastyrý úshin kóp jumys istedim. Qurbylarym «Qysylma, protezsiz júre ber» dep aıtatyn. Aqyrynda adamdardyń men týraly ne oılaıtynyna, qalaı qabyldaıtynyna mán bermeýdi úırendim.

Protezdi negizinen estetıkalyq maqsatta qoldandym, óıtkeni onyń fýnktsıonaldyq múmkindikterin paıdalanbaımyn. Barlyq isti sol qolymmen jasaýǵa ábden úırengenmin. Al bıonıkalyq protezben júrý yńǵaısyz. Ony únemi ózińmen birge alyp júrý kerek, onyń ústine kóbisi aýyr bolady, – dedi ol.

Álemdik brendtermen áriptestik

Ystanbuldaǵy kezdeısoq tanystyqtan keıin Aımannyń modeldik mansaby qarqyn ala bastady. Ol Qazaqstandaǵy alǵashqy kıbermodelderdiń biri retinde tanylyp, túrli elde jumys istedi. Tanymal fotograftardyń túsirilimine qatysyp, reseılik «Bı-2» tobynyń beınebaıanyna tústi. Sondaı-aq kompıýterlik oıyn keıipkerleriniń birine aınaldy.

Osy kezeńdegi alǵashqy kásibı túsirilimi Aımannyń esinde erekshe saqtalǵan. Ol 2016 jyly Sankt-Peterbýrgte ótip, modeldik portfolıosynyń qalyptasýyna jol ashypty.

– Ár túsirilimniń óz ereksheligi bar. Degenmen esimde erekshe saqtalǵany – 2016 jyly Sankt-Peterbýrgte ótken alǵashqy kásibı fototúsirilim. Onda keremet obrazdar jasaldy. Tanymal fotograf Vladıslav Korystamen jumys istegenimdi maqtan tutamyn. Ol meni modeldik jumysqa daıyndap, tamasha portfolıo jasadyq.

Apple kompanııasymen áriptestik ornatýdy armandaıtynmyn. Bul armanym oryndalǵanda da erekshe áserde boldym. 2018 jyly Ystanbulda bolǵan oqıǵa da esimde. Bir qyz meni fotosessııaǵa shaqyrdy. Oǵan jetý úshin shamamen úsh saǵat jol júrdim. Ol meni úıiniń kireberisinde sýretke túsirip, nátıjesin modeldik agenttikke jiberýdi usyndy. Sońynda modeldik agenttik meni jumysqa shaqyrdy, – dep eske alady Aıman.

Búginde ol Apple, YSL Beauty sekildi álemdik brendtermen jumys isteıdi. Degenmen model barlyq usynysty qabyldaı bermeıdi. Ózine jaqyn, ónimderin kúndelikti paıdalanatyn kompanııalarmen áriptestik ornatýǵa basymdyq beredi.

– Maǵan ózime unaıtyn kompanııalarmen ǵana jumys istegen unaıdy. Mysaly, Apple ónimderin paıdalanamyn. Sondyqtan bul brendpen áriptestik ornatý men úshin erekshe áser syılady. YSL Beauty kompanııasymen de solaı. Aldaǵy ýaqytta Mercedes-Benz jáne Lego brendterimen jumys istegim keledi.

Degenmen sońǵy ýaqytta sheteldik brendterdiń usynystarynan jıi bas tartyp júrmin. Qazaqstanda kóbirek tanylyp, elimiz úshin mańyzdy jobalardy júzege asyrǵym keledi, – dedi ol.

Halyqaralyq deńgeıde tájirıbe jınaǵan Aıman Qazaqstandaǵy modeldik naryqtyń múmkindigi áli de shekteýli ekenin aıtady. Onyń sózinshe, elimizde kıbermodelderge suranys az, al eńbekaqy deńgeıi joǵary emes. Sondyqtan ol modeldik mansabymen qatar, basqa da baǵyttardy damytyp, ınklıýzııa salasyndaǵy jobalarǵa kóńil bólip keledi.

Inklıýzııany damytý – basty maqsat

Kıbermodeldiń aıtýynsha, keıde múmkindigi shekteýli adamdardyń jetistigi eleýsiz qalyp jatady. Muny ózgertýge degen nıet keıipkerimizdi Inclusive People jobasyn qurýǵa jetelegen.

Joba aıasynda Aıman erekshe qajettiligi bar balalardy tárbıelep otyrǵan analarǵa arnalǵan fotojobalar uıymdastyrady. Sondaı-aq brendterdi ınklıýzııa taqyrybyna tartyp, fızıkalyq erekshelikteri bar áıelderdiń sán ındýstrııasynda kórinýine múmkindik jasaıdy.

– Budan bólek, protezge muqtaj adamdarǵa sapaly ári zamanaýı protez alýǵa kómektesemin. Meni adamdardyń ózi, olardyń ómirlik oqıǵalary, qıyndyqtardy qalaı eńsergeni jáne sol synaqtardan keıin qandaı tulǵaǵa aınalǵany shabyttandyrady, – dedi Aıman.

Osylaısha, modeldik mansap Aıman úshin tek ózin tanytýdyń joly emes, qoǵamdaǵy mańyzdy máselelerdi kóteretin alańǵa aınaldy. Qazir ol Inclusive People jobasymen qatar, Inclusive Agency bastamasyn da damytyp, áıelder men múgedektigi bar adamdardyń áleýetin kórsetýge kúsh salyp júr.

Keıipkerimizdiń pikirinshe, ınklıýzııa ár adamnyń qoǵam ómirine teń dárejede aralasýyna múmkindik berýden bastalady. Ol úshin olardyń shyǵarmashylyq qabiletin ashýǵa jáne túrli salada óz ornyn tabýyna jaǵdaı jasaý mańyzdy.

Buǵan deıin sán álemin moıyndatqan qazaqstandyq jigittiń Ulttyq ulanda qyzmet etip júrgenin jazǵan edik.