Álemdik brendter nelikten Reseıde taýar belgilerin qaıta tirkeı bastady
ASTANA. KAZINFORM — Sońǵy 3,5 jyldyń ishinde 250-den asa sheteldik kompanııa Reseıdegi jumysyn toqtatty nemese bul naryqtan múldem ketip qalǵan bolatyn. Alaıda, sońǵy ýaqytta reseılik naryqtaǵy kommertsııalyq qyzmetin doǵarǵan brendter tarapynan Zııatkerlik menshik jónindegi federaldyq qyzmetke (Rospatent) taýar belgilerin tirkeýge ótinim bergenderiniń legi qalyń.
Rospatentke kimder júgindi
Amerıkalyq tehnologııalyq alpaýyt Microsoft 2022 jyldyń naýryzynda Reseı naryǵynan ketetinin jarııa etip, bul naryqta taýarlar satýdy jáne qyzmetter kórsetýdi toqtatty. Alaıda 2025 jyldyń qazan aıynyń basynda korporatsııa Rospatentke taýar belgilerin tirkeýge ótinim berdi. Tizimde mynadaı taýar belgileri bar: Microsoft, Excel, Windows, Xbox, Bing, Azure, Visual Studio, Wasteland jáne State of Decay.
Sondaı-aq korporatsııa Microsoft 365 jáne Halo taýar belgilerin tirkeýge de ótinim berip otyr.
Osy jyldyń qyrkúıeginde taǵy bir amerıkalyq kompanııa — PepsiCo Mirinda logotıpi men ataýyn orys tilinde tirkeýge eki ótinim berdi.
Tamyzda Reseı naryǵynan ketken ońtústikkoreıalik Hyundai brendi taýar belgilerin tirkeýge alty ótinim jasady.
Qyrkúıekte onyń izin ala nemis avtokontserni Mercedes-Benz-te reseılik naryqqa kirýge ótinim berdi.
Osy aıda Rospatentke Vogue taýar belgisin tirkeýge ótinim kelip tústi. Ótinim berýshi — Vogue, Glamour jáne GQ jýrnaldaryn shyǵaratyn Condé Nast baspa úıi.
Japondyq Fast Retailing Co. holdıngi (Uniqlo dúkender jelisin basqarady) 2025 jyldyń 31 tamyzynda Rospatentke on jańa taýar belgisin tirkeýge ótinim berdi. Ótinimderdiń ishinde GU, Fast Retailing Co. jáne Uniqlo logotıpteri bar. Sonymen qatar holdıng Uniqlo jáne «ıÝnıklo» ataýlaryn tirkeýdi surap otyr.
Zara brendi de kók tústi jańa logotıpimen taýar belgisin tirkeýde. Ótinim 2025 jyldyń 29 tamyzynda berilgen, ótinim berýshi — «Indýstrııa de Dıseno» (kompanııanyń ıspan tilindegi ataýy — Inditex).
2025 jyldyń qazanynda frantsýz sán úıi Louis Vuitton Rospatentke úsh ótinim berdi. Olardyń ishinde kompanııa logotıpteriniń ártúrli nusqalary bar. 2022 jyldyń naýryzynda frantsýzdyq LVMH (Louis Vuitton Moet Hennessy) holdıngi Reseıden ketetinin habarlaǵan bolatyn. Sodan keıin Sephora kosmetıka dúkenderi jabylǵan edi. 2022 jyldyń 11 shildesinde Sephora-nyń reseılik bólimshesi satylǵany jarııalandy. 2022 jyldyń 10 qazanynda dúkender burynǵy reseılik «Il de Bote» brendimen qaıta ashyla bastady. 2016 jyly LVMH satyp alǵan reseılik jeli osylaı atalǵan-dy.
Kimder tirkelip úlgerdi
2025 jyldyń qyrkúıeginde Warner Bros kınostýdııasyn tirkeý týraly sheshim qabyldandy. Rospatentke taýar belgisin tirkeýge ótinim tamyz aıynda berilgen. Kompanııa Reseıde túrli ónimderdi — fılmder, saǵattar, erler men áıelder kıimi, beıneoıyndar, as úı ydystary, uıaly telefondarǵa arnalǵan aksessýarlar men keńse taýarlaryn óndirýge jáne satýǵa quqyq aldy. Sonymen qatar, zergerlik buıymdar, oıynshyqtar, qoıyndápterler men bálish qalyptary syndy túrli turmystyq zattar tizimge endi.
Qazanda Rospatent Coco Chanel taýar belgisin (ótinim 2024 jyldyń qarashasynda Shveıtsarııadan berilgen) tirkedi. 2024 jyldyń sońynan beri kompanııa shamamen 26 taýar belgisin tirkeýge ótinim bergen. Olardyń qatarynda — kompanııa ataýynyń oryssha jáne aǵylshynsha nusqalary, zergerlik buıymdar toptamalary, ıis sý men kosmetıka ataýlary, sondaı-aq parfıýmerııalyq bótelkelerdiń syrtqy kórinisin tirkeýge arnalǵan eki ótinim bar. Chanel brendi 2022 jyldyń naýryzynda Reseıdegi jumysyn toqtatqan edi. Eki jyldan keıin naryqtan tolyqtaı ketip, jaldaý sharttaryn buzdy jáne dúkenderin japty.
Osy aıda shveıtsarııalyq Rolex kompanııasy bes taýar belgisin tirkedi. Olardyń barlyǵy ártúrli saǵat túrlerine qatysty. Tirkelgen belgiler: Rolex President, Cerachrom, Oysterlock, Rolex Superlative jáne Rolex Glidelock.
Ne úshin tirkeý qajet
Kóptegen mamannyń pikirinshe, sheteldik kompanııalar óz brendterin quqyqtyq qorǵaýdyń merziminen buryn toqtatylýynan qorǵaý úshin taýar belgilerin tirkeýge jańa ótinimder berip jatyr. Osylaısha olar úsh jyl boıy belgi qoldanylmaǵan jaǵdaıda kúshin joıatyn normany «joıýǵa» tyrysady. Mundaı áreketter quqyqty teris paıdalaný retinde baǵalanýy múmkin. Alaıda mundaı daýlar kúrdeli ári shyǵyndy bolyp keledi. Sondyqtan kompanııalar dál osy tásildi qoldanýdy jalǵastyryp otyr.
Taýar belgisin tirkeý brendterdi kóshirmeden qorǵaýǵa jáne tanymaldylyqty saqtaýǵa múmkindik beredi. Osylaısha, kompanııalar parallel ımportpen kúreske aralaspaı-aq, tutynýshylar nazaryn ustap tura alady. Ádette tirkeý úsh aıǵa deıin sozylady. Biraq eger ózgerister az bolsa, protsess tezirek aıaqtalýy múmkin.