Álemdik brendti zańsyz paıdalanǵan almatylyqqa 1,5 mln teńge aıyppul salyndy
ASTANA. KAZINFORM – Almaty bazarlarynyń birinde «HUGO BOSS» saýda belgisin zańsyz paıdalanǵan kásipkerge 1,5 mln teńge aıyppul salynǵan. Bul týraly Ádilet mınıstrliginiń resmı ókili Talǵat Ýálı vedomstvoynń baspasóz máslıhatynda aıtty.
«Osy jyldyń basynan beri bóten taýar belgisin zańsyz paıdalaný deregi boıynsha kásipkerlik sýbektilerine 216 tekserý júrgizildi. Onyń nátıjeleri kórsetkendeı qoldanystaǵy zańnamany buzýdyń 196 faktisi anyqtaldy. 175 sýbekt ákimshilik jaýapkershilikke tartylyp, memleketke 14 mıllıon teńgeden astam aıyppul óndirildi. Azamattyq aınalymnan jalpy somasy 102 mln teńgeden astatyn 320 myń kontrafaktilik ónim tárkilendi», - dedi Talǵat Ýálı.
Resmı ókil naqty mysal da keltirdi.
«Máselen osy jyldyń 28 tamyzynda Almaty qalalyq Ádilet departamentiniń qyzmetkerleri «HUGO BOSS» saýda belgisin zańsyz paıdalanyp, kontrafaktilik taýarlardy satyp kelgen saýdagerdi áshkereledi. «HUGO BOSS» kompanııasy ókiliniń ótinishi boıynsha, Almatydaǵy saýda bazarlarynyń birinde erler kıimin kóterme baǵada satýmen aınalysqan jeke kásipkerge jospardan tys tekserý júrgizildi. Tekserý barysynda «HUGO BOSS» taýar belgisin zańsyz paıdalaný faktisi rastaldy. Nátıjesinde jalpy somasy 1,5 mln teńgeden asatyn 1600 kontrafaktilik taýar tárkilendi», - dedi ol.
Talǵat Ýálıdiń sózinshe, kásipker jalǵan ónimdi naryqtaǵy túpnusqanyń baǵasynan 300 paıyz tómen baǵamen búkil Qazaqstan aýmaǵynda taratyp kelgen.
«Búginde kináli tulǵaǵa Ákimshilik quqyq buzý týraly kodekstiń 158-baby (bótenniń taýar belgisin, qyzmet kórsetý belgisin, taýar shyǵarylǵan jerdiń ataýyn nemese fırmalyq ataýdy zańsyz paıdalaný) boıynsha ákimshilik jaýapkershilikke tartyldy. Kontrafaktilik ónimder joıyldy», - dedi mınıstrliktiń resmı ókili.
Talǵat Ýálı Almaty bazarlarynyń birinde «Djınn» kúnbaǵys tuqymynyń taýar belgisin de zańsyz paıdalaný deregi tirkelgenin aıtady.
«Tekseris barysynda jalpy somasy 700 myń teńgeden asatyn 2000 býma kontrafaktilik ónim anyqtalyp, tárkilendi. Atalǵan is boıynsha materıaldar odan ári qaraý jáne kinálilerdi jaýapkershilikke tartý úshin sotqa jiberildi», - dedi ol.
