Álemdik boks qaýymdastyqtary arasyndaǵy daý: Álimhanuly men Eleýsinovtiń jaǵdaıy ne bolady
ASTANA. KAZINFORM – Álemdik boks qaýymdastyǵynda WBO jáne IBF uıymdary men jańadan qurylǵan Zuffa Boxing promoýsheni arasyndaǵy kelispeýshilik ýshyǵyp barady, dep habarlaıdy Vringe.com.
Bul jaǵdaı qazaqstandyq boksshylar — álem chempıony Jánibek Álimhanuly men Olımpıada chempıony Danııar Eleýsinovtiń mansabyna áser etýi múmkin.
Zuffa Boxing — tarıhtaǵy alǵashqy jabyq formattaǵy boks uıymy, qurylymy jaǵynan UFC úlgisine uqsas: óz tizimi, óz reıtıngi jáne jeke chempıondyq belbeýleri bar. Uıymdy Dana Ýaıt basqarady, al jobany Saýd Arabııasy men Týrkı ál ash-Sheıh (Riyadh Season) qarjylandyrady.
Bokstyq uıymdar jańa jobaǵa narazy, sebebi Zuffa Boxing olardyń chempıondyq belbeýlerin moıyndamaıdy, al bul óz kezeginde WBO jáne IBF sııaqty qurylymdarǵa qarjylyq túsim ákelmeıdi. Ózderiniń narazylyǵyn olar «boksshylardyń quqyqtaryn qorǵaý» jáne «Alı zańynyń ózgeristerine qarsy shyǵý» dep túsindiredi.
Zuffa Boxing jobasy teleseriktestermen kelisimge kelip úlgerdi. Al bul ýaqytta dástúrli promoýterler — Bob Arým men El Heımon jańa kelisimsharttar taba almaı otyr. Naryqtaǵy basqa boks jobalary kóbine DAZN strımıngine táýeldi, ol da Riyadh Season qarjysymen jumys isteıdi.
BoxingScene habarlaýynsha, WBO men IBF Zuffa Boxing-ke qarsy ortaq kúres júrgizýge kelisken. Olar 2026 jyldyń kúzinde Orlando qalasynda birlesken konferentsııa ótkizýdi josparlap otyr. Bul sharada uıymdar jańa erejelerdi talqylap, «jergilikti tıtýldardy» taǵaıyndamaq.
Al WBA men WBC bul jıynǵa shaqyrylmaǵan, sebebi atalǵan uıymdar áldeqashan Saýd Arabııa tarapynan demeýshilik kómek alyp keledi.
IBF pen WBO ókilderi Zuffa Boxing engizbek bolǵan ózgeristerge «qarsy turý jáne áshkereleý» mindetin óz moınyna almaq. Degenmen nege bul áreket tek kelesi jyly bastalatyny ázirge belgisiz.
Qaqtyǵystyń basty suraǵy — qazirgi chempıondar men boksshylardyń mártebesi. WBO jáne IBF tujyrymy boıynsha álem chempıony Jánibek Álimhanulynyń, sondaı-aq Zuffa Boxing promoýsheninen shaqyrtý alǵan Danııar Eleýsinovtiń kelesi jekpe-jekteri belgisiz kúıinde qalýy múmkin.
Mamandardyń pikirinshe, eger Zuffa Boxing óz júıesin tolyq iske qossa, dástúrli uıymdardyń tıtýldary men reıtıngileriniń bedeli tómendep, kóptegen sportshylar jańa platformaǵa aýysýǵa májbúr bolady.
Aıta keteıik, Jánibek Álimhanulynyń Erıslandı Laramen chempıondyq jekpe-jegi resmı jarııalandy.