Álemdik BAQ-taǵy Qazaqstan: Jańa «Altyn adam», nıqabqa tyıym jáne paromdyq reıster

ASTANA. KAZINFORM–Apta ishinde jahandaǵy aqparat taratýshy ınternet-basylymdar Qazaqstandaǵy oqıǵalardy qapy jibermedi. Onyń ishinde qoǵamdyq orynda nıqab kııýdi shekteıtin zań jobasy, shekara mańyndaǵy órt qaýipsizdigi turǵysynda Qytaımen kelisim qaýzalǵan. Ázerbaıjan men Qazaqstan arasynda turaqty paromdyq reıster ashylatyny jáne Almaty oblysynda saq dáýirine jatatyn altyn júzik erekshe nazarǵa túsken. Tolyǵyraq Kazinform tilshisiniń sholýynan oqyńyz.

Anadolu: Qazaqstanda bet jabatyn kıimge tyıym salynady

Qazaqstan Parlamenti Májilisi qoǵamdyq orynda adamnyń bet-álpetin tolyq jabatyn kıim-keshek kııýge tyıym salatyn zań jobasyn maquldady. Endi qujat Prezıdentke qol qoıýǵa jiberilgen. Bul jóninde Anadolu agenttigi jazdy.

Іshki ister mınıstrligi ázirlegen qaýipsizdikke qatysty zań jobasynyń bir bóligine quqyqtyq norma engiziletinin aıtqan edi. Qujatta qoǵamdyq orynda nıkab sekildi adamnyń bet-júzin tutas jabatyn kıimderge tyıym salý qarastyrylǵan. Degenmen, shekteýdiń birqatar ereksheligi bar. Atap aıtqanda, zań talaptaryn oryndaý úshin, medıtsınalyq maqsatta, tótenshe jaǵdaılar kezinde, aýa raıy qolaısyz bolǵanda nemese sporttyq jáne mádenı sharalarǵa qatysqan kezde bet-júzdi jabatyn kıim kııýge ruqsat etiledi.

Mundaı shekteý Ortalyq Azııada burynnan bar. 2023 jyly Ózbekstanda atalǵan shekteýmen mazmundas talap zań aıasynda qabyldandy. Ótken jyly Tájikstanda ulttyq mádenıetke jat dep tanylǵan kıimderdi kııý men satýǵa zań júzinde shekteý qoıyldy. Al bıyl Qyrǵyzstan adamnyń bet-álpetin anyqtaýǵa múmkindik bermeıtin kıim kııýge tyıym salǵan bolatyn.

Trend: «Quryq–Alıat–Quryq» baǵytynda turaqty paromdyq reıs iske qosylady

Qazaqstanda alǵash ret «Quryq–Alıat–Quryq» baǵytynda turaqty paromdyq reıs iske qosylmaq. Bul jańalyq Mańǵystaý oblysynyń ákimi Nurdáýlet Qılybaı men «Georgian Industrial Group» kompanııasy dırektorlar keńesiniń tóraǵasy Davıd Bejýashvılı kezdesýinen belgili boldy. Qos taraptyń aqparatyn Trend basylymy jetkizdi.

Basqosýda Kaspıı teńizindegi paromdyq tasymaldy damytýǵa baǵyttalǵan ınvestıtsııalyq joba talqylanǵan. Investor Kaspıı teńizi arqyly turaqty júk tasymalyn qamtamasyz etý maqsatynda arnaıy kemeler satyp alǵan. Bıyl qyrkúıekten bastap bul kemeler qazaqstandyq MSC Middle Corridor Maritime kompanııasynyń basqarýyna ótip, Qazaqstan alǵash ret «Quryq–Alıat–Quryq» baǵytynda turaqty reısterdi júzege asyrýdy kózdep otyr. Marshrýt aıyna 8–9 ret qatynaıdy degen jospar bar. Bir keme bir ýaqytta 54 fýrany tasymaldaı alady.

2027 jylǵa deıin kompanııaǵa jyl saıyn eki keme, tórt parom qosylmaq. Basqa da parom operatorlarymen yntymaqtastyqty keńeıtý boıynsha kelissózder júrgizilýde..

Kezdesý barysynda oblys ákimi jobanyń óńirlik logıstıkany damytýǵa zor serpin beretinin ataǵan. Sonymen qatar taraptar ınvestıtsııalyq yntymaqtastyqty, onyń ishinde ónerkásiptik ınfraqurylymdy damytý, agroónerkásip salalaryndaǵy seriktestik máselesin talqylaǵan. Davıd Bejýashvılı Mańǵystaý óńirinde birqatar jobany júzege asyrýǵa nıetti ekenin jetkizdi.

Sınhýa: Qazaqstan men Qytaı shekara mańyndaǵy orman órtimen kúresti kúsheıtedi

Qazaqstanmen shekaralas Shyńjań-Uıǵyr avtonomııalyq ólkesiniń Іle-Qazaq avtonomııalyq okrýginde dala órtiniń tutaný yqtımaldyǵy joǵary. Atalǵan aımaqqa Shyńjań orman órt sóndirý bas komandasynyń jasaǵy jaýapty. Olar Qazaqstan-Qytaı arasyndaǵy 800 shaqyrym shekara syzyǵy boıynda órt qaýipsizdigin qadaǵalap otyr. Málimetti qytaılyqSınhýa taratty.

Shekara mańyndaǵy órt sońǵy ret úsh jyl buryn bolǵan. Sol kezde oqıǵa ornyna 130-dan astam maman, 30-dan astam kólik, 800 órt sóndirý jabdyǵy men kommýnıkatsııa qurylǵysy qoldanylǵan. Nátıjesinde, órt 4 kún ishinde sóndirildi.

Bıyl maýsym aıynda Іle órt sóndirý jasaǵy men Qazaqstan órt sóndirýshileriniń ókilderi birlesken oqý-jattyǵýǵa qatysty. Onyń sheńberinde órt sóndirý jáne qutqarý barysynda týyndaıtyn máseleler pysyqtalyp, aldaǵy jospar naqtylanǵan.

«Eger Qytaı men Qazaqstan shekarasynda órt shyqsa, bizdiń tarap bastamashy bolyp, qutqarý operatsııasyna belsene qatysýy tıis. Qajet bolǵan jaǵdaıda qazaqstandyq taraptyń ótinishi boıynsha transshekaralyq órt sóndirý operatsııasyn júzege asyrýǵa bolady», – delingen Іle órt sóndirý jasaǵynyń aqparatynda.

TASS: Taǵy bir «Altyn adam» tabylýy múmkin

Ál-Farabı atyndaǵy QazUÝ-dyń arheologııalyq ekspedıtsııasy saq dáýirine jatatyn altyn áshekeılerdi tapty. Qazba jumystary tarıh fakýltetiniń dekany, professor Dosbol Baıǵonaqovtyń jetekshiligimen Almaty oblysynyń Uıǵyr aýdanynda júrgizilgen. Bul týraly reseılik TASS aqparat agenttigi habarlady.

Toǵyzbulaq-1 qorǵanynan tabylǵan saq dáýirine jatatyn altyn áshekeıler 1969 jyly Esik qalasynyń mańynan tabylǵan áıgili «Altyn adamnyń» áshekeılerine uqsas. Sondyqtan ǵalymdar kezekti «Altyn adam» tabylýy múmkin degen tujyrymda.

Qaradala óńirinde osyndaı shamamen 50 saq qorǵany ornalasqan. Ál-Farabı atyndaǵy Qazaq ulttyq ýnıversıtetiniń ǵalymdary eki aı ishinde solardyń altaýyn zerttedi. Olardyń aıtýynsha, qorymdar sol zamannyń bılik ókilderine tıesili.

«Bul jerde de «Altyn adam» jerlengen bolýy múmkin degen boljam bar. Alaıda kóptegen qorǵan erte zamanda-aq tonalyp ketken. Soǵan qaramastan, bular – sol dáýirdiń bıleýshi toptarynyń qorymdary. Qorǵandar elıtalyq sanatqa jatady. Aldyn-ala baǵalaý boıynsha tabylǵan altyn buıymdar b.z.d. IV–III ǵasyrlarǵa jatady», – dedi ekspedıtsııa jetekshisi Dosbol Baıqonaqov.

Toǵyzbulaq aýylynyń mańynda erte temir dáýirine jatatyn qorǵandar zerttelgen. Mamandar aýyldyń ońtústik bóliginde ornalasqan jáne 20-dan astam qorǵannan turatyn Toǵyzbulaq-1 jáne Toǵyzbulaq-2 qorymdarynda dalalyq zertteýler júrgizgen. Arheologııalyq nysandardyń negizgi bóligi tizbektele ornalasqan, soltústikten ońtústikke baǵyttalǵan elıtalyq qorǵandarǵa jatady. Toǵyzbulaq-2 qorymy aýyldyń soltústiginde ornalasqan, jalpy sany 30-dan asatyn túrli qorǵandardan turady.

№3 qorǵannyń úıindisinen adamnyń súıek qaldyqtary, altyn plastınalar tabyldy. Olardyń arasynda arystannyń sýreti salynǵan altyn júzik erekshelenedi. Mundaı artefaktiler sırek kezdesedi.

«Salmaǵy 8 gramǵa jýyq júzik altyn quımasynan jasalǵan. Júziktegi arystannyń beınesi sınkretızmmen tyǵyz baılanysty. Bir qaraǵanda áıeldiń júzin, arystannyń tumsyǵy men jalyn, tipti buqany, qoshqardy kórýge bolady, olardyń tańbasy ejelgi taıpalarda keń taraǵan», – delingen habarlamada.