Álemdik BAQ-taǵy Qazaqstan: Starlink-pen kelisim, otbasy ınstıtýtyn damytý jáne TurkPA kezdesýi

ASTANA. KAZINFORM - Apta ishinde jahandaǵy ınternet-basylymdar Qazaqstanǵa qatysty kóptegen jańalyqty bólisti. Reseımen shekarada tabylǵan jańa ósimdik túri, eldegi otbasy qundylyǵyn ilgeriletýge jasalǵan áreket pen Memleket basshysynyń Túrki memleketteri Parlamenttik assambleıasy ókilderimen kezdesýi aıtylǵan. Starlink ınternetin jaldaý taqyryby da nazardan túspegen. Tolyǵyraq Kazinform tilshisiniń sholýynan oqyńyz.

Anadolu: Qazaqstan túrki memleketteriniń parlamenttik dıplomatııasyn qoldaıdy

Prezıdent Qasym-Jomart Toqaev Túrki memleketteri Parlamenttik assambleıasyna múshe elder parlamentteriniń spıkerlerimen kezdesti. Memleket basshysy assambleıa usynǵan tyń bastamalardy qoldaıtynyn aıtyp, túrki yqpaldastyǵyna úles qosýǵa daıyn ekenin jetkizgen. Aqparatty Anadolu agenttigi bólisti.

Kezdesý barysynda Toqaev Parlamenttik Assambleıaǵa mańyzdy saıası qurylym dep baǵa berip, Senat Tóraǵasy retinde jumys istegen tájirıbesin mysalǵa keltirgen.

– Qazaqstan – Túrki memleketteri uıymynyń negizin qalaýshylardyń biri. Bul qurylym elderimizdiń ekonomıkalyq jáne mádenı-gýmanıtarlyq damýyna erekshe yqpal etedi dep senemiz. Onyń áleýetin halyqtarymyzdyń ortaq maqsatyna paıdalanǵan jón dep sanaımyz. Byltyr Qazaqstan Túrki memleketteri uıymyna tóraǵalyq etti. «TURKTIME» uranymen biz birqatar mańyzdy jobany júzege asyrdyq. Túrki yqpaldastyǵyn tereńdetýge serpin beretin 100-ge jýyq is-shara uıymdastyrdyq. Astanada V Dúnıejúzilik kóshpendiler oıyndary ótti. Baıraqty báseke Uly dala órkenıetin jer-jahanǵa tanytty. Túrki álipbıiniń ortaq nusqasy bekitildi. Muny tarıhı oqıǵa deýge bolady, – dedi Memleket basshysy.

Qasym-Jomart Toqaev Túrki memleketteri uıymynyń janyndaǵy Turaqty ókilderdi taǵaıyndaý týraly sheshim qabyldanǵanyna, uıym elderi arasynda saýda-ekonomıka, energetıka, qarjy jáne ınvestıtsııa salasyndaǵy baılanys arta túskenine nazar aýdardy.

Jıyndaǵy qorytyndy sózinde Prezıdent kezdesý túrki memleketteriniń maqsat-múddesi bir ekenin aıqyn kórsetetinin, tatýlyqty saqtaý men nyǵaıtý barshaǵa ortaq mindet dep atady.

Report: Starlink-pen kelisimge qol qoıyldy

Tsıfrlyq damý, ınnovatsııalar jáne aeroǵarysh ónerkásibi mınıstrligi men Starlink kompanııasy (SpaceX-tiń enshiles qurylymy) spýtnıktik ınternet qyzmetin Qazaqstan aýmaǵynda resmı iske qosý týraly kelisimge qol qoıdy. Qujat kompanııanyń eldegi aqparattyq qaýipsizdik jáne baılanys salasyndaǵy zańnamasyn saqtaı otyryp jumys istemek. Jańalyqty Report basylymy habarlady.

Qujatqa súıensek, Starlink qazaqstandyqtarǵa spýtnıktik termınaldaryn resmı túrde satýdy jáne iske qosýdy kózdeıdi. Satylym bıyl úshinshi toqsanda bastalady dep josparlanyp otyr.

Jobany iske asyrý – eldiń shalǵaı óńirlerin joǵary jyldamdyqtaǵy spýtnıktik ınternetpen qamtamasyz etýde mańyzdy qadam sanalady. Joǵary jyldamdyqty ınternetke Starlink arqyly qosylý aýyldyq mektepter, medıtsınalyq mekemeler, mobıldi toptar men ınfraqurylym nysandaryna sapaly baılanysqa qol jetkizýge múmkindik beredi.

«Búginge deıin Starlink elimizde tek mektepterge ınternet usynyp, pılottyq rejımde jumys istep keldi. Al halyq úshin ol resmı túrde qoljetimsiz edi. Endi kelisimge keldik, kompanııa aqparattyq qaýipsizdik pen baılanys salasyndaǵy ulttyq zańnama talaptaryna saı jumys isteıtin bolady. Bıyl qajetti jumystar júrgizilip, turǵyndar resmı ári zańdy túrde spýtnıktik ınternetke qosyla alady», — dedi mınıstr Jaslan Madıev.

Starlink jabdyqtaryn zańdastyrý men resmı qoldaný mártebesiniń erekshe mańyzy bar: endi azamattar termınaldardy zańdy túrde satyp alyp, tirkeı alady. Starlink spýtnıktik ınternetine qosylý arnaıy paıdalanýshy qurylǵysy arqyly iske asady. Qazirgi ýaqytta jeke paıdalanýshylarǵa qyzmet kórsetý tártibi men tehnıkalyq-uıymdastyrýshylyq máseleler talqylanýda.

Trend: Otbasy ınstıtýtyn damytý jalǵasýda

Qazaqstan otbasy ınstıtýtyn nyǵaıtý jónindegi sharalardy júıeli iske asyryp keledi. Bul týraly Mádenıet jáne aqparat mınıstrliginiń Jastar jáne otbasy isteri komıtetiniń tóraǵasy Qaırat Qambarov Bakýde ótken halyqaralyq jıynda málimdegen. Komıtet basshysynyń sózin Trend agenttigi taratty.

Beısenbide Ázerbaıjanda Túrki memleketteri uıymynyń otbasy máseleleri men áleýmettik saıasatqa jaýapty basshylarynyń ekinshi otyrysy ótti. Kezdesýge Qazaqstan tarapynan Mádenıet jáne aqparat mınıstrliginiń Jastar jáne otbasy isteri komıtetiniń tóraǵasy Qaırat Qambarov qatysqan. Ol memlekette qolǵa alynǵan jastar saıasaty men otbasy qundylyǵyn damytý jobalary týraly oı bólisti.

«Memleket otbasy ınstıtýtyn nyǵaıtý, ana men balany qorǵaý, sondaı-aq genderlik teńdikti qorǵaý jónindegi sharalardy dáıekti túrde iske asyrýda. Úkimet qoǵamdyq ómirdiń barlyq salalarynda er men áıelge qatysty jumysty jalǵastyra bermek, – dedi komıtet basshysy.

Qambarov otbasy ınstıtýtyn nyǵaıtý úshin túrli is-shara, festıval, aktsııa ótkizilip jatqanyn atap ótti. Jas analar úshin ıkemdi jumys kestesi qarastyrylyp, jumyspen qamtýdyń gıbrıdti ádisi tańdalǵanyn aıtty.

TASS: Qazaqstan-Reseı shekara mańynan jańa ósimdik túri tabyldy

Jaqynda V.N.Tatışev atyndaǵy Astrahan memlekettik ýnıversıteti mamandary qazaqstandyq zertteýshilermen birlesip Qazaqstan-Reseı shekarasy mańynda ekspedıtsııa uıymdastyrdy. Tekseris barysynda astragal tuqymdasyna jatatyn ósimdiktiń jańa túri anyqtalǵan. Málimetti reseılik TASS aqparat agenttigi jarııalady.

Ázirge belgilisi, ósimdiktiń jańa túrin tabýǵa V.Tatışev atyndaǵy Astrahan memlekettik ýnıversıtetiniń qyzmetkerleri men M.Ótemisov atyndaǵy Batys Qazaqstan ýnıversıtetiniń ǵalymdary qatysqan.

«Inder-2025» halyqaralyq ǵylymı-zertteý ekspedıtsııasyna jetekshilik etken V.Tatışev atyndaǵy Astrahan memlekettik ýnıversıtetiniń professory Alekseı Laktıonovtyń aıtýynsha, ósimdik Inder aýdanynda ósedi. Kópjyldyq ósimdiktiń jańa túrine Ivanov astragaly ataýy berilgen. Reseılik ǵalymdar astragaldyń birneshe túrin onkologııalyq aýrýlardy emdeýge paıdalaný maqsatynda zertteýler júrgizýdi qolǵa alypty.

– Bul ósimdik Inder tuzdy kúmbezi aımaǵynyń endemıgi bolyp shyqty. Alǵashqy jınalǵan gerbarıı úlgisi Sankt-Peterbýrgtegi Reseı ǵylym akademııasynyń V.Komarov atyndaǵy Botanıkalyq ınstıtýtynda ǵylymı gerbarııinde saqtaýly tur. Gerbarıı halyqaralyq derekter qoryna engizildi. Ivanov astragaly – kópjyldyq jartylaı buta. Onyń uzyndyǵy 5-10 sm-den aspaıdy. Ashyq qyzǵylt tústi gúl shoǵynyń uzyndyǵy – 5-8 sm. Jemisi – jumyrtqa tárizdes, uzyndyǵy 12-20 mm-lik shar tárizdi burshaq. Burshaǵynyń ishi qýys, quramynda 25-ke jýyq dáni bar, – deıdi Alekseı Laktıonov.