Álemdik BAQ-taǵy Qazaqstan: Munaı óndirisin arttyrý, Nıderland elimen kelisim, ınvestorlardy qorǵaý jáne jolbarystar
ASTANA. KAZINFORM – Bul aptada álemdik medıada Qazaqstan habary kóbeıdi. Reseı prezıdentiniń Qazaqstanǵa sapary barysynda ákelingen amýr jolbarystary, Nıderland elimen 160 mln eýroǵa jasalǵan mámile kóp aıtyldy. Investorlardyń quqyn qorǵaý baǵytyndaǵy bastamalar jáne munaı óndirisin ulǵaıtý men elektr energııasyn ımporttaý jaıy nazardan tys qalmaǵan. Tolyǵyraq Kazinform tilshisiniń sholýynan oqyńyz.
Reuters: Seriktes elder Qazaqstannan munaı óndirý kólemin arttyrýdy surady
Qazaqstannyń seriktesteri OPEK+ kelisimi aıasynda belgilengen shekteýlerge qaramastan, elden munaı jetkizý kólemin ulǵaıtýdy surap otyr. Energetıka mınıstri Erlan Aqkenjenov málimdemesin Reuters taratty.
- Álemge qazaqstandyq munaı qajet ekenin jaqsy bilemiz jáne biz seriktesterimiz úshin senimdi jetkizýshimiz. Ormýz buǵazyndaǵy shekteýlerge baılanysty seriktesterimiz bizden jetkizilim kólemin arttyrýdy surap otyr, – dedi Aqkenjenov jýrnalısterge.
Mınıstrdiń aıtýynsha, seriktester tarapynan suranys óte joǵary.
- Olar múmkindiginshe kóp kólemdi talap etip otyr. Alaıda Qazaqstannyń qazirgi óndiris kólemi aıasynda ınfraqurylymdyq shekteýler bar, – dedi ol.
Munaı óndirý men eksport kólemin ulǵaıtý maqsatynda Qazaqstan «Qashaǵan» ken ornyndaǵy josparlanǵan jóndeý jumysyn 2027 jylǵa shegerdi.
Sonymen qatar Qazaqstan Baký–Tbılısı–Jeıhan munaı qubyry arqyly tasymaldanatyn shıkizatty jylyna josparlanǵan 1,5 mıllıon tonnadan 2,2 mıllıon tonnaǵa deıin arttyrýǵa daıyn.
TASS: Reseı Qazaqstanǵa tasymaldaıtyn elektr energııasyn 28%-ǵa arttyrdy
Reseıdegi elektr energııasyn eksporttaý jáne ımporttaý jónindegi jalǵyz operator – «Inter RAO» kompanııasy 2026 jyldyń qańtar–mamyr aralyǵynda Qazaqstanǵa 1,4 mlrd kVt·saǵ elektr energııasyn jetkizgen. Bul ótken jyldyń sáıkes kezeńimen salystyrǵanda 28%-ǵa kóp.
TASS aqparat agenttiginiń jazýynsha, mamyr aıynda «Inter RAO» basqarma múshesi Aleksandra Panına Reseıdiń 2026 jyly Qazaqstanǵa 4,3 mlrd kVt·saǵ elektr energııasyn jetkizýdi josparlap otyrǵanyn málimdegen edi.
Report: Qazaqstan-Nıderland €160 mln kóleminde jobalardy iske asyrýǵa kelisti
Saýda jáne ıntegratsııa mınıstri Arman Shaqqalıev Nıderlandqa jumys sapary barysynda Qazaqstan–Nıderland bıznes-forýmyna qatysty. Report-tyń habarlaýynsha, forým aıasynda jalpy quny 160 mln eýrony quraıtyn birlesken jobalardy iske asyrý jóninde kelisimderge qol qoıylǵan.
Qazaqstandyq delegatsııa Nıderlandtyń jetekshi memlekettik jáne salalyq uıymdarymen kelissózder júrgizdi. Mysaly, Naktuinbouw basshylyǵymen tuqym sharýashylyǵy, sertıfıkattaý jáne aýyl sharýashylyǵy ónimderiniń sapasyn baqylaý máselelerin talqylady.
Al Damen Shipyards Group kompanııasymen keme jasaý salasyndaǵy yntymaqtastyq perspektıvalary qaralǵan. Kezdesý qorytyndysynda Mańǵystaý oblysynda keme jasaý jáne keme jóndeý klasterin qurý jobasyn iske asyrýǵa baǵyttalǵan memorandýmǵa qol qoıyldy.
Budan bólek, Axia Seeds jáne DENSO AgriTech Solutions kompanııalarymen kezdesýler ótken. Onda zamanaýı agrotehnologııalardy engizý, tuqym sharýashylyǵyn damytý jáne jylyjaı keshenderine ınvestıtsııa tartý máseleleri sóz boldy.
The Times of Central Asia: Investorlardyń quqyǵyn qorǵaý kúsheıtiledi
Qazaqstan ınvestıtsııalyq ahýaldy jaqsartý maqsatynda ınvestorlardyń quqyǵyn kúsheıtýdi josparlap otyr. Osy maqsatta óńirler men respýblıkalyq mańyzy bar qalalarda ınvestıtsııalyq máseleler jónindegi arnaıy prokýrorlar taǵaıyndalyp, QR Bas prokýratýrasy janynan ınvestorlar men memlekettik organdar arasyndaǵy daýlardy sotqa deıin retteýge arnalǵan arnaıy platforma qurylady. Jańalyqty The Times of Central Asia jetkizdi.
Sońǵy zańnamalyq túzetýlerden keıin elde Bas prokýror Investıtsııalyq ombýdsmen qyzmetin de atqaryp, otandyq jáne sheteldik ınvestorlardyń zańdy múddesin qorǵaıdy.
Investıtsııalyq prokýrorlar óńirlik jáne respýblıkalyq mańyzy bar qalalardaǵy prokýratýranyń qyzmetkerleri qatarynan taǵaıyndalmaq.
Euronews: Turan jolbarysyn qalpyna keltirý maqsatynda amýr jolbarystary jetkizildi
Reseı prezıdenti Vladımır Pýtın memlekettik sapary barysynda Qazaqstanǵa tórt amýr jolbarysyn syıǵa tartty. Bul qadam Ortalyq Azııada 70 jyldaı buryn joıylyp ketken turan jolbarysyn qaıta jersindirý jobasy aıasynda júzege asyp otyr. Aqparatty Euronews bólisti.
Reseıden jetkizilgen tórt amýr jolbarysy «Іle-Balqash» memlekettik tabıǵı rezervaty aýmaǵyna ornalastyryldy. Olardyń qatarynda 3-4 jasar eresek atalyq jáne analyq jolbarystar, sondaı-aq 6-7 aılyq eki kúshik bar.
