Álemdik BAQ-taǵy Qazaqstan:«Qara jáshik», oqý aqysy, áýe kompanııasyndaǵy tekseris pen shoshqa etiniń eksporty

Bul aptada álem nazary Qazaqstanda boldy desek artyq emes. Ásirese Aqtaý mańyndaǵy ushaq apaty basty aqparattyq birine aınaldy. Medıada jańa termınal, oqý aqysynyń kóptigi, otandyq kompanııanyń shoshqa etin eksporttaýy da aıtylǵan. Tolyǵyraq Kazinform tilshisiniń sholýynan oqyńyz.

Anadolu: Azerbaijan Airlines ushaǵynyń ekinshi «qara jáshigi» tabyldy

Bakýden Groznyıǵa bet alǵan Azerbaijan Airlines ushaǵy Aqtaý mańynda apatqa ushyraǵany belgili. Sońǵy derekke súıensek, mamandar áýe kemesindegi ekinshi «qara jáshikti» taýypty. Túrkııalyq Anadolu aqparat agenttigi oqıǵa hronologııasy men ahýal týraly habar taratty.

Oqıǵanyń órbý baǵyty tómendegideı:

25 jeltoqsan kúni saǵat 10:43-te Aqtóbedegi aýdandyq dıspetcher ortalyǵy Embraer 190 ushaǵynyń reısi jáne Groznyıdaǵy qosymsha aerodromǵa qonýy tıis bolǵany týraly habar alǵan. Qazaqstannyń aýmaǵyna kelgenshe ushaqtyń basqarý júıesi «syr bergen» jáne Rostov dıspetcheri Mahachkala men Bakýdaǵy aýa raıy buzylǵanyn, ekıpaj Aqtaýǵa burylýǵa sheshim qabyldaǵanyn eskertipti. Oǵan deıin Aqtaýdaǵy barlyq jedel qyzmet kómek kórsetýge daıyn bolǵan. Al saǵat 10:53-te Rostov dıspetcheri jolaýshylar kabınasynda ottegi ballony jarylǵanyn, ushaqtaǵylar esinen tanǵanyn habarlaǵan eken.

Aıta keterligi, apat kezinde Qazaqstannyń avıatsııa salasyndaǵy barlyq kásiporny men «QazAeroNavıgatsııa» dıspetcherleri jáne Aqtaý áýejaıynyń qyzmetkerleri joǵary kásibı biligin kórsetken. Naqty úılesimdi jáne jedel jumys istegeni baıqalady. Ushaq Qazaqstannyń áýe shekarasyna kirgenge deıin-aq avarııalyq qyzmet ázir bolypty.

Ushaq ekıpajy eki márte qonýǵa tyrysqan. Biraq baǵyty aýytqyp, bıik qubylǵan. 11:28 shamasynda ushaqpen baılanys úzilip, artynsha áýe kemesi jerge soǵylǵan.

Daryo: Mınıstrlik Sirena Travel áýe kompanııasynyń daýynan soń tekseris bastaýy múmkin

Avıabıletterdi satyp alý servısindegi qazaqstandyqtardyń jeke derekteri urlanǵan. Barlyq málimet Reseıdiń «Sırena-Trevel» atty kompanııasynan alynypty. Daryo basylymy jańalyqqa qatysty QR Aqparattyq qaýipsizdik komıtetiniń tóraǵasy Rýslan Ábdiqalyqovtyń sózin bólisti.

Rýslan Ábdiqalyqov qazaqstandyqtardyń ushaq saparyna qatysty derekteri jelige taraǵanyn rastady. Degenmen zańsyzdyq Reseı aýmaǵynda bolǵan ári Qazaqstannyń kompanııalary buǵan kináli emes degen ustanymda.

Komıtet basshysynyń aıtýynsha, azamattardyń jeke kýáligindegi aty-jóni men qujat nómiri urlanǵan. Derekter buzylǵannan keıin aqparattyq qaýipsizdik komıteti taldaý júrgizipti. Jaqynda Rýslan Ábdiqalyqov EGOV portaly arqyly azamattardy aqparattandyrý iske qosylatynyn atap ótti.

Endi komıtet derekteri urlanǵan azamattardyń atyn anyqtap, olarǵa arnaıy habarlandyrý jiberýdi kózdep otyr. Oǵan qosa jeke derekteri urlanǵan azamattar otandyq áýe kompanııalarynyń ústinen shaǵym túsire alatynyn jetkizdi. Zań negizinde zardap shekken tarap óziniń jeke derekteriniń qupııasyn saqtamaǵany úshin jaýapty kompanııany sotqa berýge quqyly.

Al shaǵym negizinde komıtet otandyq kompanııalarǵa tekseris júrgizip, olardyń aqparattyq qaýipsizdik jónindegi Qazaqstan zańnamasyn qalaı saqtap jatqanyn tekserýge múmkindik almaq.

«Derekter Reseı Federatsııasynyń aýmaǵynda ornalasqan «Sırena–Trevel» degen kompanııasynan urlanyp otyr. Bul -avıabıletterdi brondaý qyzmetin usynatyn servıs. Oqıǵadan soń mınıstrlik «Roskomnadzorǵa» arnaıy hat jiberdi. Ol hatta oqıǵanyń mán-jaıyn anyqtap, buǵan qatysty qandaı sharalar qoldanylatyny jóninde aqparat berýin suradyq», – deıdi Rýslan Ábdiqalyqov.

Trend: Qazaqstan Alıat portyna termınal salýdy josparlap otyr

Qazaqstan 2025 jyly Ázerbaıjandaǵy Alıat portynda jańa termınal salýdy josparlap otyr. Bul týraly Májilis otyrysynda QR Kólik mınıstri Marat Qarabaev málimdedi. Jańalyqty ázerbaıjandyq Trend aqparat agentti jazdy.

Qazaqstan tarapy Alıat portynda, Máskeý mańyndaǵy Selıatıno kentinde, Belarýstiń Svısloch stantsııasynda jáne Tashkentte termınaldar qurylysyn bastaýdy pysyqtap jatyr. Nysandardyń qurylysy kelesi jyly bastalmaq. Jańa termınaldardyń jalpy qýaty jylyna 1,2 mıllıon konteınerdi quraıdy dep boljanǵan.

«Bolashaqta Rýmynııanyń Konstantsa, Vengrııanyń Býdapesht jáne Qytaıdyń Úrimshi qalalarynda birlesken termınaldar qurý josparlanyp otyr. Nátıjesinde syrtqy termınaldardyń qýatty bes ese artady jáne qazaqstandyq kólik dálizderi arqyly júk tasmaldaıtyn negizgi elderden júk jetkizý jeńildeıdi», – dedi mınıstr.

CentralAsia: Depýtat JOO oqý aqysyn synady

Májilis depýtaty Qaırat Balabıev Qazaqstandaǵy joǵary bilimge qoljetimdilik máselesin kóterdi. Onyń aıtýynsha, ýnıversıtettegi oqý baǵasynyń joǵary bolýy stýdentter men olardyń otbasyndaǵy áleýmettik jaǵdaıdy nasharlatýda. Máseleni CentralAsia qozǵady.

Ashyq derekkózderge sensek, talapkerlerdiń basym bóligi aqyly negizde oqýǵa májbúr. Bul rette oqý aqysy Abylaı han atyndaǵy Qazaq halyqaralyq qatynastar jáne álem tilderi ýnıversıtetinde – 1 mln teńgege, Nazarbaev Ýnıversıtetinde 9 mln teńgege jetedi. Balabıevtiń aıtýynsha, JOO-lar kelisimshartqa ınflıatsııaǵa baılanysty tólemderdi ındeksteý týraly erejeni engizgen. Bul tutynýshylardyń quqyna qysym jasaý dep málimdedi.

Sondaı-aq keıbir JOO-da stýdentter jataqhanada turý úshin jylyna 1 mln teńgege deıin tóleıdi. Bul, ásirese, joǵary kýrs stýdentteri úshin qarjylyq aýyrtpalyqqa aınalǵan.

«Stýdentterdiń ata-anasynyń jalaqysy artsa, jaqsy! Biraq mundaı úderisti baıqamaımyz. Bul – áleýmettik ádiletsizdik, – dedi Qaırat Balabıev.

Depýtat Ǵylym jáne joǵary bilim mınıstrligin baǵa saıasatyna qatysty baqylaýdy kúsheıtýge, jataqhanalardaǵy jaǵdaıdy jaqsartýǵa shaqyrdy.

TASS: Qazaqstan Armenııaǵa shoshqa etin eksporttaı bastady

Qazaqstandyq kásipkerler Armenııaǵa shoshqa etin eksporttaı bastady. Negizgi jetkizýshi – EMC Agro kompanııasy. Qazirgi tańda alǵashqy tasymal jasalǵan. Aqparatty reseılik TACC jarııalady.

Aýyl sharýashylyǵy mınıstrliginiń habarlamasynda 20 tonna muzdatylǵan shoshqa eti Erevanǵa eksporttalǵany aıtylǵan. Aldaǵy ýaqytta kólemdi arttyrý josparlanypty.

Aıta keterligi, EMC Agro kompanııasy úshin bul eksport – sheteldik kásipkerlermen yntymaqtastyqtyń alǵashqy tájirıbesi. Sebebi buǵan deıin kásiporyn ónimi tek Qazaqstanda satylǵan.

«Grýzııaǵa shoshqa etin eksporttaý jóninde de kelissózder júrgizdik. Sondaı kúnderdiń birinde alǵashqy 20 tonna et te osy elge jóneltiledi. Muny Qazaqstan úshin úlken oqıǵa dep ataýǵa bolady, óıtkeni bul naryq biz úshin endi ǵana ashylyp jatyr. Armenııa men Grýzııa bizden aı saıyn 400 tonnaǵa deıin et satyp alýǵa daıyn ekendikterin bildirdi», – dedi kompanııa ókilderi.

Mınıstrlik málimetinshe, qazaqstandyq kompanııa Qytaıǵa da shoshqa etin jetkizý jolyn qarastyrýda. EMC Agro mekemesiniń óndiristik qýaty jylyna – 20 myń tonna, táýligine – 30 tonnaǵa deıin ónim óndirýge múmkindigi bar.