Álemdik BAQ-taǵy Qazaqstan: Búrkitshiler baıqaýy, e-CMR júkqujaty, Kaspıı tabanymen tartylǵan ınternet
ASTANA. KAZINFORM – Bul aptada álemdik basylymdar Qazaqstan jaıly birshama jańalyq jarııalady. Belgııa koroli Fılıpp pen patshaıym Matıldanyń memlekettik sapary, Transkaspıı talshyqty-optıkalyq baılanys jelisiniń iske qosylýy jáne búrkitshiler dodasy kóp talqylanǵan. Astana – Qulja áýe reısi men e-CMR júkqujaty týraly aqparat ta qalys qalmapty. Tolyǵyraq Kazinform tilshisiniń sholýynan oqyńyz.
Paris Match: Koroldik juptyń Qazaqstanǵa sapary
Álemdik BAQ korol Fılıpp pen patshaıym Matıldanyń Qazaqstanǵa memlekettik saparyn keńinen aqparattandyrdy. Paris Match jýrnaly mártebeli qonaqtardy Aqordada resmı qarsy alý rásimin egjeı-tegjeıli sıpattasa, eýropalyq EU Reporter basylymy Qazaqstannyń Belgııadaǵy elshisi Roman Vasılenkonyń ekijaqty yntymaqtastyqtyń keleshegine qatysty maqalasyn jarııalady.
Al RTL info jáne The Brussels Times basylymdary sapardyń tarıhı mańyzyn atap, koroldik juppen ekonomıka, bilim berý, mádenıet salalarynyń ókilderi ere kelgenine erekshe mán berdi.
Report: Transkaspıı talshyqty-optıkalyq baılanys jelisi iske qosyldy
15 qazanda Ázerbaıjan men Qazaqstan prezıdentteri eki eldi Kaspıı teńiziniń tabany arqyly jalǵastyratyn 380 shaqyrymdyq talshyqty-optıkalyq baılanys jelisin iske qosty.
Report agenttiginiń habarlaýynsha, Jobany «Qazaqtelekom» AQ men AzerTelecom kompanııasy birlesip júzege asyrǵan. Bul jeli Qazaqstandy jáne Ortalyq Azııanyń basqa elderin, sondaı-aq Qytaıdy Eýropamen jalǵaıtyn jańa baılanys baǵytynyń bir bóligi sanalady. Ol Jerorta teńizi men Qara teńizde ornalasqan baılanys júıelerine qosylýy múmkin.
Xinhua News: Astana – Qulja áýe reısi ashylady
2026 jylǵy 26 qazannan bastap Astana qalasy men Qulja qalasy (QHR) arasynda áýe reısi iske qosylady. Bul týraly qytaılyq «Sıntszıan jıbao» gazeti habarlaıdy.
Áýe tasymaly dúısenbi, sársenbi jáne senbi kúnderine qoıylǵan. Kestege sáıkes, Astanadan ushý jergilikti ýaqytpen saǵat 07:55-ke, al Quljaǵa qoný Beıjiń ýaqytymen saǵat 13:20-ǵa josparlanǵan. Keri baǵytta Quljadan ushý Beıjiń ýaqytymen saǵat 15:20-da, Astanaǵa qoný jergilikti ýaqytpen saǵat 14:50-de bolady.
Qazir Qytaıdyń Úrimji, Qulja qalalary men Qazaqstannyń Almaty, Astana, Shymkent jáne Aqtaý qalalary arasynda 6 halyqaralyq áýe marshrýty ashylǵan.
TASS: e-CMR elektrondy júkqujaty iske qosyldy
Qazaqstan men Reseı arasynda alǵash ret e-CMR elektrondy halyqaralyq júkqujaty iske qosyldy. Kólik mınıstrliginiń aqparatyn reseılik TASS agenttigi taratqan.
Mamandardyń aıtýynsha, e-CMR jobasy qujattardy resimdeý shyǵynyn azaıtyp, aqparat almasýdy jyldamdatady. Sonymen qatar júkti naqty ýaqyt rejıminde baqylaýǵa múmkindik bermek.
Pılottyń joba aıasynda alǵashqy kólik tasymaly Astana — Máskeý baǵyty boıynsha uıymdastyrylǵan. Bul – Eýrazııalyq ekonomıkalyq odaqtyń halyqaralyq júk tasymalyndaǵy qaǵaz qujattardy elektrondy formatqa kóshirý jobasynyń alǵashqy tájirıbelik kezeńi.
Euronews: «Shyǵys Salbýryny-2026» halyqaralyq festıvali bastaldy
9-10 qazanda kúnderi Shyǵys Qazaqstan oblysynyń Bozanbaı aýylynda alǵash ret qusbegilikten Azııanyń ashyq kýbogy ótti. Festıvalge toǵyz memleketten 150-ge jýyq qusbegi qatysqan. Euronews arnasy saıys týraly arnaıy habar jarııalady.
Týrnırde Qazaqstan, Túrkııa, Reseı, Qytaı, Mońǵolııa, Qyrǵyzstan, Ózbekstan, Grýzııa, Ispanııa jáne Vengrııadan kelgen úmitkerler baq synady. Eki kúnge sozylǵan sharaǵa 15 000-ǵa jýyq kórermen jınaldy.
Aıta keteıik, bıyl tazy men búrkitke qatysty festıvalderdi ıÝNESKO-nyń Adamzattyń materıaldyq emes mádenı murasynyń reprezentatıvtik tizimine engizý týraly ótinim berildi. Qusbegilik óneri buǵan deıin atalǵan tizimge engizilgen.
Jiji Press: Qazaqstan tranzıttik tasymal kólemin jylyna 100 mln tonnaǵa jetkizbekshi
Qazaqstan 2034 jylǵa qaraı jyl saıynǵy júk aınalymyn 100 mıllıard tonnaǵa deıin ulǵaıtýdy josparlap otyr. Aqparatty japondyq Jiji Press bólisti.
Osy maqsatta memleket teńiz porttary men teńiz flotynyń ótkizý qabiletin arttyrady. Ásirese temirjol, avtomobıl, teńiz jáne áýe kóligin damytý, tsıfrlyq sheshimderdi engizý qolǵa alynbaq. Sonymen qatar Shyǵys-Batys, Soltústik-Ońtústik dálizderi men Transkaspıı halyqaralyq kólik baǵytyn (Ortalyq dáliz) damytý kózdelgen.
